समाचार सारांश
- अफगानिस्तानको राजधानी काबुलस्थित लागुऔषध उपचार अस्पतालमा पाकिस्तानको हवाई आक्रमणमा कम्तीमा ४०० जनाको मृत्यु भएको अफगान अधिकारीहरूले दाबी गरेका छन्।
- पाकिस्तानले अस्पतालमाथि आक्रमण गरेको आरोप अस्वीकार गर्दै सैन्य संरचनाहरू र गोला-बारुद भण्डारण केन्द्रलाई निशाना बनाएको जनाएको छ।
- संयुक्त राष्ट्र सुरक्षा परिषद्ले अफगानिस्तानका तालिबानी नेतृत्वलाई आतंकवादविरुद्धको प्रयास तीव्र बनाउन आग्रह गरेको छ।
काठमाडौं । अफगानिस्तानको राजधानी काबुलमा अवस्थित लागुऔषध प्रयोगकर्ताहरूको लागि बनाइएको अस्पतालमा पाकिस्तानले हवाई आक्रमण गर्दा कम्तीमा ४०० जनाको मृत्यु भएको अफगान अधिकारीहरूले जानकारी दिएका छन्। तर पाकिस्तानले अस्पतालमा कुनै आक्रमण नभएको बताएको छ।
अफगान सरकारका उपप्रवक्ता हम्दुल्लाह फितरतले सामाजिक सञ्जाल एक्स (ट्विटर) मा राति करिब ९ बजे पाकिस्तानले दुई हजार शय्याको ओमर एडिक्सन ट्रिटमेन्ट अस्पतालमा आक्रमण गरेको र अस्पतालको ठूलो भाग ध्वस्त भएको घोषणा गरेका छन्। उनका अनुसार आक्रमणमा हालसम्म कम्तीमा ४०० जनाको मृत्यु तथा करिब २५० घाइते भएका छन्। अग्नि नियन्त्रण र भग्नावशेषबाट शव निकाल्न उद्धार टोली सक्रिय रहेको छ।
अफगान सरकारलेका प्रवक्ता जबिहुल्लाह मुजाहिदले अस्पताल र अन्य नागरिक संरचनाहरूलाई लक्षित गरी गरिएको आक्रमणप्रति कडा आलोचना गर्दै यसलाई मानवता विरुद्धको अपराध भनेका छन्।
पाकिस्तानको अस्वीकारोक्ति
पाकिस्तानले भने अस्पतालमाथिको आक्रमणको आरोप अस्वीकार गरेको छ। पाकिस्तानी प्रधानमन्त्री शेहबाज शरीफका प्रवक्ता मोशर्रफ जैदीले काबुलमा कुनै अस्पताललाई निशाना बनाइएको नभएको बताएका छन्। अलजजिराको रिपोर्टअनुसार पाकिस्तानले अफगान सरकारको आरोपलाई ‘गलत र भ्रम फैलाउने प्रयास’ भन्दै खण्डन गरेको छ।
पाकिस्तानको सूचना मन्त्रालयका अनुसार सोमबार काबुल र नंगरहार प्रान्तका विभिन्न स्थानमा गरिएको हवाई कारबाहीमा सैन्य संरचना, प्राविधिक उपकरणहरू र गोला-बारुद भण्डारण केन्द्रलाई निशाना बनाइएको छ। मन्त्रालयले आक्रमण अत्यन्त सावधानीपूर्वक गरिएको र कुनै नागरिक संरचनामा क्षति नपुगेको दाबी गरेको छ।
सीएनएनका अनुसार स्थानीय टेलिभिजनहरूले सार्वजनिक गरेको भिडियोमा सुरक्षाकर्मीहरूले टर्चको सहायताले घाइते र मृतकलाई बाहिर निकालिरहेको र दमकलकर्मीहरूले भग्नावशेषमा आगो निभाउन प्रयास गरिरहेको देखिन्छ।
यसैबीच, संयुक्त राष्ट्र सुरक्षा परिषद्ले अफगानिस्तानका तालिबानी नेतृत्वलाई आतंकवादविरुद्धको प्रयास तत्काल तीव्र बनाउन आह्वान गरेको छ। परिषद्ले सर्वसम्मतिका आधारमा निरन्तर आतंकवादी गतिविधिहरूको कडा निन्दा गरेको छ।
पाकिस्तानले अफगानिस्तानमा पाकिस्तानी तालिबान लगायत विभिन्न उग्रवादी समूहलाई आश्रय दिएको आरोप लगाउँदै आएको छ भने काबुलले ती आरोप अस्वीकार गर्दै आएको छ।
फेब्रुअरी अन्त्य देखि दुवै देशबीच तनाव बढेको छ। अफगानिस्तानले पाकिस्तानको सीमा क्षेत्रमा गरेको हवाई आक्रमणपछि सीमापार देखा परेका झडपहरू दुवै पक्षले जारी राखिरहेका छन्। पाकिस्तानले अफगानिस्तानसँग ‘खुला युद्ध’को अवस्था रहेको बताएको छ।
window.fbAsyncInit = function () {
FB.init({
appId: ‘280041239029772’,
xfbml: true,
version: ‘v2.7’
});
};
(function (d, s, id) {
var js, fjs = d.getElementsByTagName(s)[0];
if (d.getElementById(id)) {
return;
}
js = d.createElement(s);
js.id = id;
js.src = “https://connect.facebook.net/en_US/sdk.js”;
fjs.parentNode.insertBefore(js, fjs);
}(document, ‘script’, ‘facebook-jssdk’));
