आज ५ ऊर्जा केन्द्रहरूमा आक्रमण, प्राकृतिक ग्यासको मूल्य ३५ प्रतिशतले बढ्यो

५ चैत, काठमाडौं । आफ्नो ‘साउथ पार्स’ ग्यास फिल्डमाथि भएको इजरायली आक्रमणको बदला स्वरूप इरानले खाडीका विभिन्न देशका ऊर्जा केन्द्रहरूमा आक्रमण गरी उनीहरूलाई दबाबमा राखिरहेको छ।

अमेरिका-इजरायल र इरानबीच जारी युद्धको २०औँ दिन, ऊर्जा केन्द्रहरूमा भएका हमलाले विश्वलाई थप तनावमा राखेको छ।

दुवै पक्षले आक्रमण तीव्र बनाएका छन्। अन्तर्राष्ट्रिय सञ्चार माध्यमका अनुसार, इरानका क्षेप्यास्त्र हमलामा इजरायलमा चार जनाको मृत्यु भइसकेको छ जसमा तीन प्यालेस्टाइनी महिला र एक विदेशी नागरिक रहेका छन्।

बुधबार राति इरानी क्षेप्यास्त्रको भग्नावशेष महिलाहरूको एउटा ब्युटी पार्लरमा खसेर घटना भएको रिपोर्ट छ।

त्यसैगरी, मध्य इजरायल (सेन्ट्रल इजरायल) मा एक थाई नागरिक पनि मारिँदा छन्। यो घटना तेल अवीवको उत्तरमा पर्ने शेरोन क्षेत्रमा इरानी क्षेप्यास्त्र झारिएर भएको हो। थाइल्यान्डको विदेश मन्त्रालयका अनुसार, उनी २० वर्षका कृषिजन्य मजदुर थिए।

यसै बीच, ओमानका विदेशमन्त्री बद्र अलबुसैदीले अमेरिकाले आफ्नो विदेश नीति राम्रोसँग सम्हाल्न नसकेको बताएका छन्।

उनले भने, अमेरिका र इरान बीच सम्झौता हुन लागेको थियो, तर त्यही बेला इजरायल र अमेरिकाले आक्रमण गरेर स्थिति बिगारिदिएको उल्लेख गरेका छन्।

उनका अनुसार, इरानले गरिएको जवाफी आक्रमणहरू गलत भए पनि परिस्थितिले त्यसो हुनु अपरिहार्य बनाएको थियो।

अमेरिकाले यस युद्धमा हस्तक्षेप गर्नु सबैभन्दा ठूलो त्रुटि भएको उनले बताए र थपे, ‘यो अमेरिका आफ्नै युद्ध थिएन र यसबाट उसले कुनै फाइदा पाउने छैन।’

प्राकृतिक ग्यास मूल्यमा ३५ प्रतिशत वृद्धी

खाडी क्षेत्रमा ऊर्जा केन्द्रहरूमा तीव्र आक्रमणपछि, आज युरोपमा प्राकृतिक ग्यासको मूल्य ३५ प्रतिशतले वृद्धि भएको छ। रोयटर्सका अनुसार, २८ फेब्रुअरीमा इरानले युद्ध शुरू गरेयता युरोपमा ग्यासको मूल्य ६० प्रतिशतभन्दा बढीले बढेको छ।

विश्वव्यापी कच्चा तेलको मानक ब्रेन्ट क्रुड आयलको मूल्य पनि बढेर आज ११२ डलर प्रति ब्यारेल पुगेको छ। युद्ध शुरु भएयता कच्चा तेलको मूल्य ४८ प्रतिशतभन्दा बढीले बढेको छ। मार्च १३ देखि यसको मूल्य १०० डलर प्रति ब्यारेलभन्दा तल झरेको छैन।

मध्यपूर्वमा युद्ध बढ्दै गएपछि ऊर्जा आपूर्तिमा कस्तो प्रभाव पर्ने भन्ने अनिश्चयता निरन्तर बढिरहेको छ।

कतारले इरानी क्षेप्यास्त्रहरूसँग आफ्नो मुख्य ग्यास केन्द्र ‘रास लाफान’ मा ठूलो क्षति पुगेको जनाएको छ। त्यसैगरी, कुवेतका सरकारी सञ्चार माध्यमले देशका दुई तेल रिफाइनरीहरूमा पनि आक्रमण भएको जनाएको छ।

युद्धको २०औं दिनमा आक्रमण गरिएका ऊर्जा केन्द्रहरू यसप्रकार छन्:

१. रास लाफान इन्डस्ट्रियल सिटी, कतार

बिहीबार बिहान, कतारले इरानी क्षेप्यास्त्रहरूले आफ्नो मुख्य ग्यास केन्द्र ‘रास लाफान इन्डस्ट्रियल सिटी’ मा आक्रमण गरेपछि ठूलो क्षति पुगेको जनाएको छ।

२. मिना अल-अहमदी रिफाइनरी, कुवेत

कुवेत पेट्रोलियम कर्पोरेशनका अनुसार, कुवेत सिटीबाट करिब ५० किलोमिटर दक्षिणमा रहेको मिना अल-अहमदी रिफाइनरीको एउटा सञ्चालन इकाइमा ड्रोन ठोक्किँदा आगलागी भएको छ। यस घटनामा कुनै मानवीय क्षति नभएको बताइएको छ।

३. मिना अब्दुल्लाह रिफाइनरी, कुवेत

कुवेत पेट्रोलियम कर्पोरेशनका अनुसार, देशको दक्षिणमा रहेको मिना अब्दुल्लाह रिफाइनरीमा पनि ड्रोन आक्रमण भएको र त्यहाँ आगलागी भएको छ।

४. हब्सान ग्यास केन्द्र र बाब आयलफिल्ड, यूएई

यूएई अधिकारीहरूले आकाशबाट खसेका क्षेप्यास्त्रका भग्नावशेषहरूले हब्सान ग्यास केन्द्र र बाब तेल क्षेत्रमा असर पुर्‍याएको बताउँदै अनुसन्धान र जवाफी कार्य भइरहेको जानकारी दिएका छन्। अहिलेसम्म मानवीय क्षतिसम्बन्धी सूचना आएको छैन।

५. सामरेफ रिफाइनरी, साउदी अरब

साउदी अरब रक्षा मन्त्रालयले यान्बु बन्दरगाहस्थित साउदी अरामको ‘सामरेफ रिफाइनरी’मा एउटा ड्रोन दुर्घटनाग्रस्त भएको बताएका छन्। क्षतिको मूल्याङ्कन भइरहेको मन्त्रालयले जनाएको छ।

(एजेन्सीहरूको सहयोगमा)