रास्वपा सांसद श्रद्धा कुँवर क्षेत्रीको विकास र बजेट सन्तुलनमा जोड

५ चैत, काठमाडौं । राष्ट्रिय स्वतन्त्र पार्टी (रास्वपा) की नवनिर्वाचित सांसद श्रद्धा कुँवर क्षेत्रीले नयाँ सरकारले विकास र बजेट विनियोजन गर्दा देशभर सन्तुलित रुपमा गर्नुपर्ने बताएकी छन् ।

बिहीबार नवनिर्वाचित प्रतिनिधिसभाका समानुपातिक सांसदहरुलाई शपथ ग्रहण गराइएको थियो ।

शपथ ग्रहणपछि सञ्चारकर्मीसँग कुराकानी गर्दै उनले यसप्रकारको टिप्पणी गरेकी हुन् ।

उनी लुम्बिनी प्रदेशसँगै कर्णाली र सुदूरपश्चिमजस्ता पिछडिएका क्षेत्रका सम्भावनालाई प्राथमिकतामा राख्नुपर्नेमा जोड दिइन् ।

उनका अनुसार सबै क्षेत्रलाई समान रूपमा हेर्नु राज्यको दायित्व हो ।

‘हामी समग्र देशको लागि के आवश्यक छ भनेर बजेट र विकास विनियोजन गर्छौं । लुम्बिनी प्रदेशमात्र होइन, कर्णाली, सुदूरपश्चिमलगायत पिछडिएका क्षेत्रमा पनि आफ्नो सम्भावनालाई लिएर अगाडि बढ्नुपर्छ । सबैलाई बराबर रुपमा हेर्नुपर्छ,’ सांसद कुँवरले भनिन् ।