गोकर्णेश्वर महादेव मन्दिर क्षेत्रको जग्गा अतिक्रमण गरी बनेका १४ वटा घर खाली गर्न स्थानीयवासी र भक्तजनले माग गरेका छन्। मन्दिर क्षेत्रको अतिक्रमणले धार्मिक गतिविधिमा समस्या उत्पन्न भएको र मेलामा स्थान अभावले समस्या भएको छ। काठमाडौँ उपत्यका विकास प्राधिकरणले मन्दिर क्षेत्रलाई व्यवस्थित बनाउन घर भत्काउने र सडक सार्ने प्रतिबद्धता जनाएको थियो। २० वैशाख, काठमाडौँ।
गोकर्णेश्वर महादेव मन्दिर क्षेत्रको जग्गा अतिक्रमण गरी बनेका संरचना खाली गर्न स्थानीयवासी तथा भक्तजनले माग गरेका छन्। धार्मिक, सांस्कृतिक, पुरातात्त्विक तथा ऐतिहासिक दृष्टिले महत्वपूर्ण गोकर्णेश्वर मन्दिर क्षेत्रमा रहेका अतिक्रमित संरचनाहरू खाली गराउन भक्तजनले वर्षौंदेखि अनुरोध गर्दै आएका छन्। मन्दिर क्षेत्रको जग्गा अतिक्रमणले यहाँ हुने धार्मिक र सांस्कृतिक गतिविधिमा स्थान अभावले असहजता भएको बताइएको छ।
गोकर्णेश्वर नगरपालिका–४ मा पर्ने मन्दिर क्षेत्रमा अतिक्रमण भइरहेकाले प्रत्येक वर्ष भाद्र कृष्ण औँसीको दिन लाग्ने मेलामा समस्या भइरहेको छ। त्यस्तै, आश्विन कृष्ण पक्ष अर्थात् पितृ पक्षमा पनि गोकर्णेश्वर मन्दिर क्षेत्रको सीमित स्थानका कारण समस्या भईरहेको छ। पौष कृष्ण औँसीमा पनि हजारौँ भक्तजन गोकर्णेश्वर मन्दिर क्षेत्रमा आश्रय लिन्छन्। यस क्षेत्रमा सार्वजनिक जग्गामा अतिक्रमण गरी १४ वटा घर निर्माण भएको वडाअध्यक्ष जयराम महतले जानकारी दिएका छन्।
मन्दिर माथि करिब ६५० रोपनी क्षेत्रफलको सामुदायिक बन समेत रहेको छ। यज्ञडोल (जगडोल) सामुदायिक वनमा हाल राष्ट्रिय सहिद तथा निजामती स्मारक निर्माण भइरहेको छ। मन्दिरसँग जोडिएको सार्वजनिक जग्गामा बनेका १४ वटा घर पछिल्लो समयमा सहयोगी माध्यमिक विद्यालयलाई भोगाधिकार दिइएको छ भने सामुदायिक वन उपभोक्ता समूहका अध्यक्ष सुदर्शन सिग्देलले जानकारी दिएका छन्। यो क्षेत्रलाई पहिलेदेखि नै व्यवस्थित गर्न प्रयास भए पनि सफलता मिलेको छैन।
गोकर्णेश्वर मन्दिर क्षेत्रलाई व्यवस्थित बनाउन काठमाडौँ उपत्यका विकास प्राधिकरणसम्म प्रस्ताव पुगेको थियो। प्राधिकरणका तत्कालीन विकास आयुक्त भाइकाजी तिवारीले मन्दिर क्षेत्रको जग्गामा बनेका घर भत्काउँदै सुन्दरीजल जाने सडक सारेर मन्दिर क्षेत्रलाई व्यवस्थित बनाउन सहयोग गर्ने प्रतिबद्धता व्यक्त गरेका थिए। तर, वडाले त्यसबखत सहयोग नगरेकाले काम सम्भव नभएको गोकर्णेश्वर मन्दिर जीर्णोद्धार एवं छाना पुनर्निर्माण समितिका अध्यक्ष कोमलबहादुर विष्टले बताए। मन्दिर क्षेत्रको जग्गामा घर बनाएकाहरूको अन्यत्र पनि घर र जग्गा रहेको वडा कार्यालयले जनाएको छ। अन्य स्थानमा अतिक्रमित घरजग्गा खाली गराइरहेका बेला यहाँका संरचनाहरू पनि खाली गरिनुपर्ने स्थानीयवासी र मन्दिरमा दैनिक आउने भक्तजनको माग छ।
