रास्वपा सांसद यादवले स्यानिटरी प्याडमा लागु गरिएको कर तत्काल हटाउन सरकारसँग माग गरे
रास्वपा सांसद पुरुषोत्तम यादवले महिलाका लागि अत्यावश्यक स्यानिटरी प्याडमा लगाइएको कर तत्काल हटाउन सरकारसँग आग्रह गरेका छन्। उनले महिनावारीलाई राजश्व स्रोत बनाउने राज्यले महिला सशक्तीकरणको विषयमा बोल्ने नैतिक अधिकार नराख्ने प्रतिक्रिया दिएका छन्। स्यानिटरी प्याडमा कर लगाउनु राज्यको असंवेदनशीलताको प्रतीक रहेको र सामाजिक न्यायको सिद्धान्त विपरीत भएको उनले बताए। ५ जेठ, काठमाडौं।
प्रतिनिधि सभाको मंगलबारको बैठकमा सभामुखमार्फत सरकारको ध्यानाकर्षण गराउँदै यादवले महिनावारीलाई कुनै रहर नभई महिलाको प्राकृतिक आवश्यकता भएको बताए। उनले महिनावारीको समयमा सुरक्षित र स्वस्थ रहन पाउनु हरेक महिलाको मौलिक हक र सम्मानको विषय भएको उल्लेख गरे। यादवले महिनावारीलाई करको स्रोत बनाउन खोज्ने राज्यले महिला सशक्तीकरण र समानताको बारेमा बोल्ने नैतिक अधिकार नराख्ने प्रतिक्रिया दिएका छन्।
सांसद यादवले जनस्वास्थ्यमा हानिकारक असर पार्ने चुरोट, मदिरा जस्ता वस्तुहरूमा सिन ट्याक्स बढाउने सल्लाह दिँदै महिलाको स्वास्थ्यसँग प्रत्यक्ष सम्बन्धित स्यानिटरी प्याडमा कर लगाउनु राज्यको गम्भीर असंवेदनशीलताको प्रतीक भएको बताए। उनले भने, ‘एकातिर महिला सशक्तीकरण र लैंगिक समानताको ठूला भाषण गर्ने, अर्कोतिर स्यानिटरी प्याडजस्ता आधारभूत आवश्यक सामग्रीमा कर लगाउने कार्य सामाजिक न्यायको सिद्धान्तसँग मेल खाँदैन। यो केवल आर्थिक विषय मात्र नभई महिलाको प्रतिष्ठा, स्वास्थ्य र समान अवसरको प्रश्न हो।’
