News Summary
- नेपाल सरकारले इरानका नागरिकलाई अन अराइभल भिसा उपलब्ध नगराउने निर्णय गरेको छ।
- इरानी नागरिकले अब नेपाल आउन सरकारी वा कूटनीतिक राहदानी बाहेक नेपाली दूतावासबाट भिसा लिनुपर्ने छ।
- नेपालले अनअराइभल भिसा रोक लगाएका मुलुकको संख्या १३ पुगेको छ, जसमा अफगानिस्तान र सिरिया पनि छन्।
२९ फागुन, काठमाडौैं । नेपालले इरानका नागरिकलाई ‘अन अराइभल भिसा’ नदिने भएको छ ।
नेपाल भ्रमण गर्न चाहने इरानका नागरिकलाई नेपाल सरकारले अन अराइभल भिसा उपलब्ध नगराउने निर्णय भएको अध्यागमन विभागले जनाएको छ ।
विभागका अनुसार सरकारी र कूटनीतिक राहदानी बाहेक इरानी नागरिकले विदेशस्थित नेपाली दूतावासबाट भिसा लिएरमात्र नेपाल आउन पाउने छन् ।
अब नेपालले अनअराइभल भिसा रोक लगाएका मुलुकको सूची १३ पुगेको छ । नाइजेरिया, घाना, जिम्बाबे, क्यामरुन, स्वाजिल्यान्ड, सोमालिया, लाइबेरिया, इथियोपिया, इराक, प्यालेस्टाइन, अफगानिस्तान र सिरियाका नागरिकलाई नेपालले यसअघि नै अन अराइभल भिसा दिँदैन । साथै, शरणार्थी हैसियतका नागरिकले समेत भिसा लिएर मात्र नेपाल आउन पाउँछन् ।
