रास्वपा : दुईतिहाइ बहुमत पुगे संविधान संशोधन गर्न कति सहज, कति कठिन

रास्वपाका नेता तथा प्रतिनिधिसभाका नवनिर्वाचित सदस्य गणेश पराजुली पनि आफ्नो पार्टीलाई अहिले प्राप्त जनमत संविधान संशोधनभन्दा सुशासनको निम्ति भएको बताउँछन्।

“त्यसैले सुशासनमा काम गरेर आधार तयार गरेपछि अरू काममा लाग्ने हो,” उनी भन्छन्, “त्यसको प्रमुख बाधक भ्रष्टाचारविरुद्ध निर्ममतापूर्वक कदम चालेर हामी पहिले जग बसाल्छौँ।”

त्यसपछि मात्रै उनले कार्यदल बनाएर संविधान संशोधनको बहस अघि बढाउने बताए।

रास्वपाले उठाउँदै आएको प्रदेश संरचनाको सुधार पनि सङ्घीय संसद्‌बाट मात्र सम्भव हुँदैन। किनकि संविधानमा उक्त विषयमा प्रदेशसभाको पनि सहमति आवश्यक हुने व्यवस्था छ।

अहिलेको मिश्रित प्रणालीअनुसार कुनै एउटा दलको बहुमतको सरकार बन्न कठिन रहेको भन्ने बुझाइले पनि संशोधनको मुद्दा उठ्ने गरेको हो।

तर प्राध्यापक अधिकारी र नेता पराजुली दुवै अहिलेको चुनावी परिणामले त्यो धारणालाई खण्डित गरिदिएको बताउँछन्।

नेता पराजुलीले प्राथमिकता दिने भनेको सुशासनको निम्ति कर्मचारीतन्त्र, प्रहरी प्रशासनदेखि संवैधानिक निकायहरूलाई चरम राजनीतिकीकरणबाट मुक्त गर्दै सुधार थाल्नुपर्ने प्राध्यापक अधिकारी बताउँछन्।

जनतालाई सेवाप्रवाह सहज र छिटो छरितो दिने कुरालाई प्राथमिकता राख्नु पर्ने बताउँदै उनले अहिलेको दुईतिहाइ आसपासको शक्तिले त्यसलाई सहयोग गर्ने विचार सुनाए।

कतिपयले दुईतिहाइको शक्तिको आडमा न्यायपालिकामा सरकारले बल प्रयोग गर्न सक्ने अनुमान गरेको पाइन्छ।

तर प्राध्यापक अधिकारी दुईतिहाइको शक्ति आफै सन्तुलितको अस्त्र बन्न सक्ने बताउँछन्।

“त्यो नै पर्याप्त ‘चेक’ हुन्छ, त्यो हल्का रूपमा प्रयोग गर्ने होइन, त्यो दापभित्र राखिएको खुकुरी हो,” उनी भन्छन्, “नाङ्गो खुकुरी त आपराधिक मनसाय भएको व्यक्तिले चलाउने हो, दापभित्र राख्नु पो सान हो।”