रुकुमपूर्वको भूमे गाउँपालिकामा तीन दिनदेखि मोबाइल सेवा अवरुद्ध

रुकुमपूर्वको भूमे गाउँपालिकाका विभिन्न बस्तीहरूमा तीन दिनदेखि नेपाल टेलिकमको मोबाइल सेवा बन्द छ। मोबाइल सेवा नहुँदा बैंकिङ सेवा, विद्यालय, स्वास्थ्य सेवा र प्रशासनिक कार्यहरू प्रभावित भएका छन्। नेपाल टेलिकमको रुकुमपूर्व कार्यालयले सेवा बन्द हुनुको कारणबारे कुनै आधिकारिक जानकारी दिएको छैन। १८ चैत, रुकुमपूर्व।

रुकुमपूर्वको भूमे गाउँपालिकाका विभिन्न बस्तीहरूमा तीन दिनदेखि टेलिफोन सेवा बन्द रहेको छ। नेपाल टेलिकमको मोबाइल सेवा बन्द हुँदा स्थानीय जनजीवन प्रभावित भइरहेको छ। सोमबारदेखि सेवा अवरुद्ध भएपछि झुम्लाबाङ, मोराबाङ, सिमा, जितखोला, खाबाङ, महतलगायत गाउँहरू संचारविहीन बनेका छन्। मोबाइल सेवामा निर्भरता बढिरहेका बेला नेटवर्क अवरुद्ध हुँदा बैंकिङ सेवा, विद्यालयका गतिविधि, स्वास्थ्य सेवा र पालिकाका प्रशासनिक कामहरू प्रभावित भएका छन्।

डिजिटल माध्यमबाट हुने सेवा प्रवाहमा अवरोध आएपछि स्थानीय बासिन्दाले दैनिक कार्यहरू सञ्चालन गर्न पनि कठिनाइ भोगिरहेका छन्। नेपाल टेलिकमको रुकुमपूर्व कार्यालयले अहिलेसम्म सेवा अवरुद्ध हुनुको कारणबारे कुनै औपचारिक सूचना सार्वजनिक गरेको छैन। यसैबीच, नेटवर्क अवरुद्ध भएपछि स्थानीय चन्द्र रसाइलीले सामाजिक सञ्जालमार्फत ध्यानाकर्षण गराएका छन्। उनले भूमे–६ महतमा रहेको टेलिकम टावरको दीर्घकालीन व्यवस्थापन हुन नसकेको उल्लेख गर्दै स्थानीय विद्युत् अवरुद्धताका कारण बारम्बार सेवा ठप्प हुने समस्या दोहोरिँदै आएको बताएका छन्।