पर्वतारोहण शुल्क संकलन १ अर्बभन्दा बढी, ९४४ आरोहीलाई अनुमति प्राप्त
यो वर्ष बसन्त ऋतुमा ९४४ पर्वतारोहीले ३० हिमाल आरोहणका लागि अनुमति प्राप्त गरेका छन्। पर्यटन विभागले हिमाल आरोहणबाट १ अर्बभन्दा बढी कर संकलन गरेको छ। सगरमाथाबाट ४१० आरोहीले अनुमति लिएर ८९ करोड ३ लाख रुपैयाँ कर संकलन भएको छ। १० वैशाख, काठमाडौं।
यस वर्ष बसन्त ऋतुमा पर्वतारोहणका लागि बिहीबारसम्म ९४४ पर्वतारोहीले हिमाल चढ्न अनुमति पाएका छन्। पर्यटन विभागले सार्वजनिक गरेको साप्ताहिक विवरणअनुसार ३० हिमाल आरोहणका लागि अनुमति जारी गरिएको छ। यी आरोहीबाट विभागले १ अर्बभन्दा बढी कर संकलन गरेको छ। जसमा सबैभन्दा बढी कर सगरमाथाबाट प्राप्त भएको छ।
सगरमाथा आरोहणका लागि ४१ समूहका ४१० आरोहीले अनुमति लिएका छन्। सगरमाथाबाट मात्र ८९ करोड ३ लाख रुपैयाँ कर संकलन भएको छ। सगरमाथामा ९७ महिला आरोहीले पनि अनुमति लिएका छन्। यस सिजनमा लोत्सेका लागि ७ समूहका ८६, अमादब्लमका लागि ८ समूहका ९२, मकालु हिमालमा ५४, र हिमलुङ हिमालमा ५ समूहका ४४ जनाले आरोहण अनुमति लिएका छन्।
यस वर्ष हिमाल आरोहणका लागि चीनबाट १२७, अमेरिकाबाट १००, बेलायतबाट ६४, रूसबाट ६०, र अस्ट्रेलियाबाट २२ जना आरोहीले अनुमति लिएका छन्, विभागका तथ्यांक अनुसार।