रोल्पाको जेलबाङमा दुर्लभ रेड पाण्डाको फेला
३ जेठ, रोल्पा । रोल्पामा दुर्लभ रेड पाण्डा भेटिएको छ । जलजला क्षेत्रअन्तर्गत जेलबाङको जंगलमा विश्वमै दुर्लभ रेड पाण्डा (रातो हाब्रे) फेला परेको हो। रेड पाण्डा विश्वका दुर्लभ वन्यजन्तुहरुमा सामेल छ। पर्यटन व्यवसायी तथा फोटोग्राफर बाल्कुराम पुनले जेलबाङको जंगलमा रेड पाण्डा खेलिरहेको क्षण क्यामेरामा कैद गरेका छन्। ‘मेरो र रेड पाण्डाको अनौठो भेट भयो र मैले रेड पाण्डा खेलिरहेको फोटो र भिडियो बनाउन सफल भएँ’, उनले बताए।
शुक्रबार जंगलमा रेड पाण्डा देखेपछिमात्र नजिकबाट अवलोकन गर्न सकेका पुनले बताए, ‘यो क्षेत्रमा रेड पाण्डा छ भन्ने कुरा पहिलेदेखि थाहा थियो, मेरो र पाण्डाको करिब ३८ सेकेन्ड स्थिर भेट भयो।’ रेड पाण्डा फेला परेको उक्त क्षेत्र समुद्री सतहदेखि करिब ३ हजार मिटर उचाइमा अवस्थित छ जहाँ हिमाली बाँस र चुयाँ पाइन्छन्, जुन रेड पाण्डाको मुख्य आहार मानिन्छ।
लुम्बिनी प्रदेश अन्तर्गत रोल्पाको जलजला लगायतका क्षेत्रमा रेड पाण्डा बसोबास गर्ने अनुकूल वातावरण पाइन्छ। रोल्पामा पहिलोपटक २०७२ सालमा रेड पाण्डा फेला परेको थियो। रेड पाण्डा नेटवर्कले रोल्पाको जलजला क्षेत्र गाम, जेलबाङ, थबाङ, उवा र रुकुम पूर्वका उच्च पहाडी क्षेत्रमा रेड पाण्डाको खोजी गर्दै आएको छ। स्थानीयहरूले रेड पाण्डाको संरक्षण तथा प्रवर्द्धनमा विशेष ध्यान दिन सरकारसँग अनुरोध गरेका छन्।