२२ असोज, वासिङ्टन (रासस/एएफपी)। अन्तर्राष्ट्रिय मुद्रा कोष (आइएमएफ) ले पाकिस्तानी अधिकारीहरूसँग करिब १ अर्ब २० करोड अमेरिकी डलर उपलब्ध गराउने कर्मचारी तहको सम्झौतामा सहमति जनाएको छ। उक्त सम्झौताले कार्यान्वयनका लागि आइएमएफको कार्यकारी बोर्डको अनुमोदन आवश्यक पर्नेछ।
आइएमएफकी वार्ताकार इभा पेट्रोभाले मिडल इस्टमा जारी द्वन्द्वका प्रभावहरूका बाबजुद पाकिस्तानको अर्थतन्त्रमा सुधार देखिएको र कडा आर्थिक नीतिहरूले समष्टिगत आर्थिक स्थिरता कायम राख्न मद्दत गरेको बताइन्। पाकिस्तानको कमजोर अर्थव्यवस्थामा बढ्दो मूल्यवृद्धि, उच्च ऊर्जा मूल्य र आपूर्ति अवरोधका कारण दबाब निरन्तर रहेको उल्लेख गरियो।
आइएमएफका अनुसार आर्थिक वर्ष २०२६ को पहिलो तीन त्रैमासिकमा पाकिस्तानको वास्तविक कुल घरेलु उत्पादन (जिडिपी) ४ प्रतिशतले वृद्धि भएको छ भने समग्र आर्थिक विकास दर ३.६ प्रतिशत रहने अपेक्षा गरिएको छ। पेट्रोभाले सेप्टेम्बर महिनामा उच्चतम तहमा पुगेको मुद्रास्फीति करिब १०.३ प्रतिशतको सीमामा रहेको र मुख्य मुद्रास्फीतिलाई नियन्त्रणमा राखिएको जानकारी दिइन्।
