पाकिस्तानको बलुचिस्तान प्रान्तमा सुरक्षा बलले सञ्चालन गरेको गुप्तचर कारबाहीमा १५ जना लडाकुहरू मारिएका छन्। पाकिस्तानी सेनाको इन्टर–सर्भिसेज पब्लिक रिलेसन्सका अनुसार मास्तुङ र बोलानसहितका आठ जिल्लामा उक्त सैन्य कारबाही सम्पन्न भएको छ। कारबाहीका क्रममा ठूलो परिमाणमा हतियार बरामद गर्दै सुरक्षा बलले आतंकवाद उन्मूलन नभएसम्म कारबाही जारी राख्ने प्रतिबद्धता व्यक्त गरेका छन्।
पाकिस्तानको दक्षिणपश्चिमी बलुचिस्तान प्रान्तमा सुरक्षा बलले सञ्चालन गरेका विभिन्न गुप्तचरमा आधारित कारबाहीमा १५ जना लडाकुहरू मारिएका छन्। पाकिस्तानी सेनाको सञ्चार शाखा इन्टर–सर्भिसेज पब्लिक रिलेसन्स (आइएसपीआर)का अनुसार प्रान्तका मास्तुङ, बोलान, वाशुक, अवारान, सिबी, खुजदार, हरनाई र नुश्की जिल्लामा ती कारबाही सञ्चालन गरिएको हो।
कारबाहीका क्रममा १५ जना लडाकुहरू मारिनुका साथै उनीहरूको साथबाट ठूलो परिमाणमा हतियार तथा गोलाबारुद बरामद गरिएको आईएसपीआरले जनाएको छ। सुरक्षा कारबाहीबाट लडाकूहरूको सञ्जालमा ठूलो क्षति पुगेको तथा उनीहरूको गतिविधि र आवतजावतमा अवरोध सिर्जना भएको सेनाले जनाएको छ। पाकिस्तानी सुरक्षा बलले आतंकवाद पूर्ण रूपमा उन्मूलन नभएसम्म लडाकूविरुद्धका कारबाही निरन्तर जारी राख्ने प्रतिबद्धता व्यक्त गरेको छ।
