पाँचथरको सुकेपोखरीमा मनसुनको समयमा देखिने कुहिरो, हरियाली र मौसमको परिवर्तनले पर्यटकलाई आकर्षित गरेको छ। मेची राजमार्ग नजिकै पर्ने सुकेपोखरीमा सडक सुविधा सहज भएपछि आन्तरिक पर्यटकको संख्या बढेको स्थानीय बताउँछन्। फाल्गुनन्द पदमार्ग क्षेत्रभित्र पर्ने सुकेपोखरीमा होमस्टे र होटलको पूर्वाधार विकाससँगै पर्यटन प्रवर्द्धनको सम्भावना बढेको छ। ३१ साउन, पाँचथर। बिहानको झुल्के घामसँगै सुकेपोखरीबाट टाढा हिमालको धर्सो देखियो। केही समयमा कुहिरोले हिमाललाई छोप्यो। एकैछिनमा खुलेको आकाश फेरि बादलले ढाकियो। कुहिरो र घामबीचको यो खेलले सुकेपोखरी आसपासको दृश्य अझ मनमोहक बनाएको थियो। मनसुनमा सुकेपोखरीको सुन्दरता विशेष रंग लिएर आउँछ। चारैतिर फैलिएको हरियाली, डाँडामा दौडिरहेका बादल, चिसो लेकाली हावा र विभिन्न ठाउँमा फुलेका रंगीन फूलहरूले यहाँ आउने जोकोहीलाई केहीबेर प्रकृतिमा रमाउन बाध्य पार्छ। मेची राजमार्गअन्तर्गत पौवाभञ्ज्याङ बजार नजिकै रहेको सुकेपोखरी पाँचथरको आकर्षक पर्यटन स्थल हो। मौसमको परिवर्तनसँगै यहाँको दृश्य पनि फरक देखिन्छ। मनसुनमा कुहिरो र हरियालीले छोपिएको सुकेपोखरीमा केही हप्तापछि कञ्चनजङ्घा, कुम्भकर्ण लगायतका हिमश्रृंखलाहरू खुल्दैछन्। चैत–बैशाख महिनामा यो क्षेत्र गुराँसको फुलले ढाकिन्छ। सुकेपोखरी र आसपासका फराकिला चौरहरू अहिले हरिया छन्। साना र ठूला पोखरीमा आकाशको रंग झल्किन्छ। डाँडामा बादल दौडिँदै र कुहिरोको पुनःआउनुले प्राकृतिक दृश्य चित्रझैँ देखिएको छ। लेकाली भएकोले यहाँको मौसम चिसो र शीतल रहन्छ। प्रकृतिसँगै यहाँको ग्रामीण जीवन पनि अत्यन्त आकर्षक छ। खेतबारीमा किसानहरू व्यस्त छन्। आलु खेत फाँट खाली भएपछि मुला रोप्न आतुर रहेका छन। कृषि र पशुपालन यहाँको जीविकोपार्जनको मुख्य आधार हुन्। विभिन्न प्रकारका रुख–वनस्पति र मौसमी फूलहरूले सुकेपोखरीको प्राकृतिक विविधता झल्काउँछन्। यहाँ आउने पर्यटकले प्रकृतिको दृश्यसँगै स्थानीय परिकारको स्वाद पनि लिन सक्छन्। आन्तरिक पर्यटकको संख्या बढेसँगै होमस्टे र होटलहरूको संख्या पनि बढिरहेको छ भन्छन् स्थानीय अजय राई। सुकेपोखरीसँगै लोहाकी लगायतका क्षेत्रहरू पनि पर्यटकका लागि आकर्षक गन्तव्य बनेका छन्। फाल्गुनन्द पदमार्ग यही क्षेत्र हुँदै जान्छ, जसले पर्यटन सम्भावनालाई अझ व्यापक बनाएको छ। यो पदमार्ग कोशी प्रदेशको महत्वपूर्ण पर्यटन परियोजना हो। ‘यहाँको दृश्य मौसम अनुसार फरक तर आकर्षक हुन्छ,’ स्थानीय सुरेश राईले बताए। अहिले सडक पहुँच सहज हुँदै गएपछि मनसुनमा पनि सुकेपोखरी घुम्न आउने आन्तरिक पर्यटकको संख्या बढेको स्थानीयहरूले बताएका छन्। हिमाल अवलोकन गर्न उपयुक्त मौसम कुर्न पर्दैन सुकेपोखरीमा। कहिले कुहिरोले हिमाल छोप्छ भने कहिले घामले डाँडालाई उज्यालो बनाउँछ। कहिले बादल डाँडामाथि दौडिन्छ भने कहिले हरियालीबीच फूलहरू मुस्कुराउँछन्। मौसम परिवर्तनसँगै निरन्तर बदलिने यी दृश्यहरू मनसुनमा सुकेपोखरीको विशेष आकर्षण बनेका छन्।
