इन्डोनेसियाको फ्लोरेस टापुमा भूकम्पले ५१ जनाको मृत्यु, ५ हजारभन्दा बढी विस्थापित
पूर्वी इन्डोनेसियाको फ्लोरेस टापुमा शनिबार गएको ७.७ म्याग्निच्युडको शक्तिशाली भूकम्पमा कम्तीमा ५१ जनाको मृत्यु भएको छ। विपद् व्यवस्थापन निकायका अनुसार करिब ५ हजार मानिस विस्थापित भएका छन् भने १५७ घर पूर्ण रूपमा ध्वस्त भएका छन्। परराष्ट्रमन्त्री शिशिर खनालले इन्डोनेसियामा भएको जनधन क्षतिप्रति दुःख व्यक्त गर्दै नेपाल सरकारका तर्फबाट समवेदना र एकता प्रकट गरेका छन्।
भूकम्पको केन्द्र पूर्वी नुसा तेङ्गारा प्रान्तको फ्लोरेस टापुस्थित एन्डे सहरबाट करिब ६८ किलोमिटर उत्तर–उत्तरपश्चिममा थियो। अमेरिकी भूगर्भ सर्वेक्षण (यूएसजीएस)का अनुसार भूकम्प स्थानीय समयअनुसार शनिबार बिहान ५:५८ बजे गएको थियो। भूकम्पपछि करिब ३४१ वटा परकम्पहरू पनि आएको अधिकारीहरूले बताएका छन्। उपस्वास्थ्य मन्त्री बेन्जामिन पाउलस अक्टाभियानुसले आइतबार टेलिभिजनमार्फत जानकारी दिँदै ३६ जना गम्भीर घाइते र ७७ जना सामान्य चोटग्रस्त रहेको बताए।
इन्डोनेसियाको विपद् व्यवस्थापन निकाय बीएनपीबीका अनुसार सबैभन्दा प्रभावित क्षेत्र सिक्का रिजेन्सीमा ३३०० भन्दा बढी मानिस घरबाट विस्थापित भएका छन्। उनीहरू बाटो अवरुद्ध हुँदा त्यहीँ फसेका छन् र केहीलाई खेलकुद रंगशालामा अस्थायी रूपमा राखिएको छ। बन्दरगाह सहर माउमेरेमा केहि स्थानिय बासिन्दा भत्किएका घर बाहिर त्रिपाल टाँगेर बसेका छन् भने केही घाइतेहरूलाई स्थानीय अस्पतालबाहिर बनाइएको अस्थायी शिविरमा उपचार गरिएको छ।
बीएनपीबी प्रमुख लेफ्टिनेन्ट जनरल सुहार्यान्तोका अनुसार कम्तिमा १५७ घर पूर्ण रूपमा ध्वस्त भएका छन् र करिब २०० घरमा क्षति पुगेको छ। उद्धार टोली अझै नाजेकेओका सबै प्रभावित क्षेत्रमा पुग्न सकेका छैनन्। पहिरोले सडक अवरुद्ध र सञ्चार सेवा प्रभावित भएपछि उद्धारमा कठिनाइ भइरहेको छ भनी खोज तथा उद्धार निकायका प्रमुख फाथुर रहमानले बताए। क्याबिनेट सचिव टेडी इन्द्र विजायाका अनुसार उद्धार तथा राहतका लागि देशभरिको ३५०० भन्दा बढी सैनिक र प्रहरी परिचालन गरिएको छ।
