३१ साउन, काठमाडौं। नेकपा एमालेका नेता खगेन्द्र राईको सम्झनामा एक प्रतिष्ठान स्थापना गरिएको छ। राजधानीमा बसोबास गर्ने खोटाङबासीहरूको भेलाले ‘खगेन्द्र राई स्मृति प्रतिष्ठान’ गठन गरेको हो। प्रतिष्ठानको अध्यक्षमा राईकी पत्नी बिमला र महासचिवमा भवानी लुइँटेल चयन भएका छन्। प्रतिष्ठान स्थापना गर्न आयोजित भेलामा एमाले केन्द्रीय सदस्य विशाल भट्टराईले राजनीतिक र प्रगतिशील साहित्यको क्षेत्रमा राईले पु¥याएको योगदानहरू प्रस्तुत गरेका थिए। जनसांस्कृतिक महासंघका पूर्व केन्द्रीय अध्यक्ष तथा एमालेका पूर्व केन्द्रीय सदस्य राई गत २० फागुनमा चुनावी अभियानका क्रममा निधन भएका थिए। ४२ वर्षसम्म सक्रिय राजनीतिमा रहेका राईको स्मृतिलाई जीवित राख्न यो प्रतिष्ठान स्थापना गरिएको एमाले खोटाङका अध्यक्ष देवविक्रम राईले बताए।
‘खगेन्द्र राईको निधन हुँदा उहाँको परिवार एक्लोपनमा परेको छ। हाम्रो पार्टीले पनि एक अभिभावक र एक योद्धा गुमाएको पीडा छ,’ भेलामा देवविक्रमले भने, ‘यो प्रतिष्ठानबाट हामी खगेन्द्र राईलाई सम्झिरहने काम गर्नेछौं र नयाँ पुस्तालाई उहाँलाई चिनाउनेछौं।’ खगेन्द्र राईकी पत्नी बिमलाले कुनै विद्यार्थीको अनुहारमा आउने चमक र विपन्न परिवारको खुशीले खगेन्द्र राईको सम्मान हुने बताइन्। ‘उहाँ हाम्रो परिवारको मूल मात्र हुनुहुन्थेन, चेतनाको धुरी पनि हुनुहुन्थ्यो,’ बिमलाले भनिन्, ‘तर अब उहाँ फर्कनुहुन्न, त्यसैले कुनै असहायको अनुहारमा खुशी ल्याउँदा उहाँको सम्मान र सम्झना हुनेछ।’ प्रतिष्ठानका सदस्यहरूमा आशिष राई, मिशन राई, ईन्द्र लिमेल मगर र सुशीला तिमल्सिना चयन भएका छन्। बाँकी पदाधिकारी र सदस्यहरू राईकै गृह जिल्ला खोटाङबाट चयन गरिनेछ।
