चीनले आफ्नो स्थानीय स्रोत र आवश्यकताअनुसार कृत्रिम बुद्धिमत्ता (एआई) उद्योगको विकास गर्दै राष्ट्रिय स्तरमा एआई पूर्वाधार विस्तारमा तीव्रता दिएको छ। सन् २०२४ को जुन महिनाको अन्त्यसम्म चीनको बुद्धिमान कम्प्युटिङ क्षमता वार्षिक १७७ प्रतिशतले वृद्धि हुँदै २,१८५ इफलोप्समा पुगेको छ। सियाओ होङवेईले चीनमा एआई प्राविधिक अवधारणाबाट वास्तविक उत्पादन वृद्धिमा रूपान्तरण हुने प्रक्रिया तीव्रगतिमा रहेको बताएका छन्।
चीनका ३१ प्रान्तीय क्षेत्रहरूबाट संकलित पछिल्लो आर्थिक तथ्यांकहरूले एआई उद्योग क्षेत्रगत र भौगोलिक विशेषताअनुसार विकास भइरहेको देखाएका छन्। एआई सम्बन्धित उत्पादन र सेवाहरूको माग पनि निरन्तर बढ्दो छ। सियाओका अनुसार बेइजिङ, साङ्घाई र ग्वाङडोङ प्रविधि, मानवशक्ति र औद्योगिक पूर्वाधारका कारण एआई उद्योगको विकासमा अग्रणी भूमिका निर्वाह गरिरहेका छन्।
सन् २०२६–२०३० को पञ्चवर्षीय योजनामा यी तीन क्षेत्रहरूले विश्वव्यापी एआई प्रतिस्पर्धात्मक क्षमता वृद्धि गर्ने लक्ष्य राखेका छन्। बेइजिङ आफैंलाई विश्वव्यापी एआई नवप्रवर्तन केन्द्रका रूपमा विकास गर्ने प्रयासमा जुटेको छ। नगर साइबरस्पेस प्रशासनका अनुसार जुलाई २३ सम्म २५९ वटा लार्ज मोडल र १९५ वटा एआई उत्पादन दर्ता भइसकेका छन्।
चीनका अन्य क्षेत्रहरूले पनि आफ्ना विशिष्ट स्रोत साधन र औद्योगिक क्षमतामा आधारित विभिन्न एआई विकास क्षेत्रहरू पहिचान गरेका छन्। उदाहरणका लागि, पूर्वी आन्हुई प्रान्तले एआई चिप उद्योगको विकासलाई तीव्र बनाएको छ। लिचुआन एआई कम्प्युटिङ सेन्टरले स्थानीय प्राकृतिक स्रोत र हावापानीलाई प्रयोग गरेर एआई पूर्वाधारको विकास गरेको छ। यसले करिब १५० ‘पेटाफ्लप्स’ कम्प्युटिङ क्षमता प्रदान गर्दछ र यसको उपयोग दर ८० प्रतिशतभन्दा बढी छ।
