लन्डन निवासी धावक सन्तोष राईले ‘आइरनम्यान लिड्स’ प्रतियोगितामा उत्कृष्ट प्रदर्शन गर्दै आफ्नो उमेर समूहमा दोस्रो र समग्रमा ५१औं स्थान हासिल गरेका छन्। आइतबार सम्पन्न प्रतिस्पर्धामा राईले यो उपलब्धि हासिल गर्न सफल भए।
सन्तोष राई आइरनम्यान वर्ल्ड च्याम्पियनसिप, कोना, हवाईमा छनोट हुने पहिलो नेपाली र पहिलो लन्डन बस चालक बनेका छन्। उनले भने, “कोना, हवाईमा हुने आइरनम्यान वर्ल्ड च्याम्पियनसिपका लागि मेरो पहिलो प्रयास सफल भएको छ।” आइरनम्यान लिड्स विश्वकै सबैभन्दा चुनौतीपूर्ण फारम्यान्ड ट्रायथलन कोर्सहरू मध्ये एक हो, जसमा ३.८ किलोमिटर पौडी, १८० किलोमिटर साइकलिङ र ४२.१९५ किलोमिटर म्याराथन दौड समावेश छ।
पानीको सुरक्षा कारणले कथित पौडी चरण रद्द गरिएको थियो र प्रतिस्पर्धामा साइकल र दौडमात्र सञ्चालन गरिएको थियो। सन्तोषले भने, “मेरो लागि सबैभन्दा महत्त्वपूर्ण कुरा भनेको कोना, हवाईमा हुने आइरनम्यान वर्ल्ड च्याम्पियनसिपको लागि छनोट हुनु हो, जुन मेरो पहिलो प्रयासमा सफल भएको छ।” यस वर्ष अक्टोबर १० मा कोना, हवाईमा आयोजना हुने विश्व प्रतियोगिताका लागि छनोट हुन अत्यन्तै कडा प्रतिस्पर्धा हुनेछ।
सन्तोष राईले सन् २०२४ मा नेपालको तर्फबाट पहिलो पटक वर्ल्ड च्याम्पियनसिप लङ डिस्टेन्स ट्रायथलनमा प्रतिस्पर्धा गर्दै टप १३ मा पर्न सफल भएका थिए। उनले नेपाल रन यूकेको संस्थापकको रूपमा विश्वको प्रतिष्ठित लन्डन म्याराथनको ४५औं संस्करणमा नेपाली राष्ट्रिय पोशाकमा दौड्दै गिनिज वर्ल्ड रेकर्ड समेत बनाएका छन्।
