स्पेनका पूर्व मिडफिल्डर सर्जियो बुस्केट्सले प्रशिक्षक करिअर सुरु गर्न आफ्नो पुरानो क्लब बार्सिलोनामा फर्किएका छन्। ३८ वर्षका बुस्केट्स बार्सिलोनाको रिजर्भ टोली ‘बार्सा एथलेटिक’ मा प्रशिक्षक जुलियानो बेलेत्तीको स्टाफ सदस्यका रूपमा काम गर्नेछन्। उनले बार्सिलोना क्लबका लागि ७२२ खेल खेल्दै नौपटक ला लिगा र तीनपटक च्याम्पियन्स लिगसहित धेरै उपाधि जितेका थिए। २ भदौ, काठमाडौं।
बुस्केट्स स्पेनको चौथो श्रेणीमा रहेको बार्सिलोना रिजर्भ टोली ‘बार्सा एथलेटिक’ मा प्रशिक्षक जुलियानो बेलेत्तीको स्टाफ सदस्यका रूपमा काम गर्नेछन् र प्रशिक्षकका लागि आवश्यक लाइसेन्स पनि पूरा गर्नेछन्। बार्सिलोना एथलेटिक पछिल्लो समय कमजोर प्रदर्शनका कारण दोस्रो श्रेणीबाट दुई स्तर तल झरेर सेगुन्डा फेडेरासियोनमा पुगेको छ। बेलेत्ती र बुस्केट्सको मुख्य लक्ष्य टोलीलाई तेस्रो श्रेणीमा फर्काउनु र पहिलो टोलीका लागि प्रतिभाशाली युवा खेलाडीहरू विकास गर्नु हो।
बुस्केट्स सन् २००५ मा किशोर खेलाडीका रूपमा बार्सिलोनाको एकेडेमीमा आबद्ध भएका थिए। सिनियर टोलीमा स्थान बनाउनुअघि उनले रिजर्भ टोलीतर्फ २५ खेल खेलेका थिए। त्यसपछि पेप ग्वार्डियोला को प्रशिक्षणमा मुख्य टोलीमा स्थान बनाएका उनले बार्सिलोना क्लबका लागि ७२२ खेल खेलेका छन्। बार्सिलोना क्लबका लागि सर्वाधिक खेल खेल्नेमध्ये बुस्केट्सपछि लियोनल मेसी र जाभी हर्नान्डेज मात्रै छन्। उनले क्लबबाट नौपटक ला लिगा र तीनपटक च्याम्पियन्स लिगसहित धेरै उपाधि जितेका थिए।
स्पेनका लागि १४३ खेल खेलेका बुस्केट्स सन् २०१० को विश्वकप र २०१२ को युरोपियन च्याम्पियनसिप जित्ने टोलीका महत्वपूर्ण सदस्य थिए। बार्सिलोना छाडेपछि उनलाई सन् २०२३ मा इन्टर मियामी क्लबले भर्ती गर्यो। त्यहाँ उनले पूर्व बार्सिलोनाका सहकर्मी तथा निकट मित्रहरू लियोनल मेसी, जोर्डी अल्बा र लुइस सुवारेजसँग खेलेका थिए। इन्टर मियामीका लागि ११६ खेल खेल्न सफल बुस्केट्सले सन् २०२३ मा लिग्स कप र सन् २०२५ मा एमएलएस कप जितेर आफ्नो खेलाडी जीवनबाट सन्यास लिएका थिए। अब उनी बार्सिलोना युवा टोलीबाटै आफ्नो प्रशिक्षक जीवनको यात्रा सुरु गर्न लागेका छन्।
