२ भदौ, काठमाडौं । नापी कार्यालय धनुषाले नाप जाँच भएको लगभग दस वर्षपछि धनुषाको सबैला नगरपालिका वडा नं ११ का ५७ परिवारहरूलाई जग्गाधनी पुर्जा वितरण गरेको छ। साविक मखनाहा गाउँ विकास समिति वडा नं ६, ७, ८, ९ अन्तर्गत पर्ने गाउँ ब्लक ९ (स्ववासी) को जग्गाको नापजाँच आर्थिक वर्ष २०७२/७३ मा सम्पन्न भएको थियो। नापजाँच सम्पन्न भए पनि जनसहभागितामा कमीका कारण पुर्जा वितरण प्रक्रिया लामो समयसम्म रोकिएको थियो। विगतमा आयोगबाट नापनक्सा भइसकेको जग्गामा आवश्यक प्रक्रिया पूरा गरी ५७ थान जग्गाधनी पुर्जा वितरण गरिएको हो। पुर्जा प्राप्त भएपछि ती ५७ परिवारहरूले लामो समयदेखि स्ववासीको रुपमा बसोबास गर्दै आएका जग्गामा औपचारिक रूपमा कानुनी स्वामित्व पाएको पुष्टि भएको छ।
