१३ असोज, वासिङ्टन (रासस/एएफपी)। अमेरिका र क्यानाडाबीच व्यापारिक तनाव बढिरहेका बेला क्यानाडाबाट आयात हुने मदिरा लगायत विभिन्न उत्पादनमा अमेरिकाले मंगलबारदेखि नयाँ प्रतिबन्ध लागू गरेको छ। अमेरिकी राष्ट्रपति डोनाल्ड ट्रम्पले यस महिनाको सुरुमै प्रतिबन्धको घोषणा गरेका थिए। प्रतिबन्धमा बियर, स्पार्कलिङ वाइन, ब्रान्डी, सेक लगायतका मदिरासँगै दुग्धजन्य मट्ठा प्रोटिन र उच्च क्षमताका मोटरसाइकल पनि समावेश छन्।
सेप्टेम्बर ८ मा क्यानाडाले अमेरिकाबाट हुने निर्यातमा लगभग २० अर्ब अमेरिकी डलर बराबरका शुल्कहरू लगाएको प्रतिक्रिया स्वरूप अमेरिका यस कदममा उत्रिएको हो। राष्ट्रपति ट्रम्पले क्यानाडाली मदिरा माथिको प्रतिबन्धलाई अमेरिकी उत्पादनमाथि क्यानाडाको ‘भेदभावपूर्ण’ व्यवहारको जवाफ भने। अगस्टमा वाशिङ्टनमा व्यापार सम्बन्धी वार्ता असफल भएपछिको परिस्थिति दुई देशबीचको तनाव अझ बढ्ने कारण बनेको छ।
क्यानाडाको लगभग ६० प्रतिशत आयात अमेरिका बाट हुन्छ भने करीब ७० प्रतिशत निर्यात अमेरिकी बजारमा जान्छ। क्यानाडाली सरकारले व्यवसायी र कामदारलाई सहयोग गर्न पाँच अर्ब ४० करोड अमेरिकी डलरको आर्थिक प्याकेज घोषणा गरेको छ। स्पिरिट्स क्यानाडाका अनुसार अमेरिका क्यानाडाली मदिराका मुख्य निर्यात बजार हुन् र क्यानाडाको स्पिरिट उत्पादनको करीव ५० प्रतिशत अमेरिकी मागमा निर्भर छ। प्रतिबन्धका कारण क्यानाडाली उत्पादकहरूले तत्काल अमेरिकी बजारमा गुमेको माग अन्यत्रबाट पूर्ति गर्न सीमित अवसरहरू मात्र रहेको संगठनले जनाएको छ।
