भारतीय प्रधानमन्त्री नरेन्द्र मोदीले फ्लाई दुबईका पाइलट क्याप्टेन स्मित मच्छरासँग टेलिफोनमा कुराकानी गरेका छन्। उक्त संवादमा मोदीले स्मितको साहस र सुझबुझको प्रशंसा गरे। मोदीले देशभर उनका दीर्घायु र शीघ्र स्वास्थ्यलाभको कामना भइरहेको बताए। गम्भीर चोट लागेका अवस्थामा पनि यात्रुको ज्यान बचाउन क्याप्टेन स्मितले गरेको निर्णयप्रति पूरै देशलाई गर्व रहेको उनले बताए। ‘पूरै देश तपाईंका लागि प्रार्थना गरिरहेको छ। ठाउँ–ठाउँमा महामृत्युञ्जय मन्त्रको जाप भइरहेको छ,’ मोदीले स्मितसँग भने, ‘तपाईंको साहस, धैर्य र सुझबुझले धेरै मानिसको ज्यान बचायो।’
मोदीले क्याप्टेन स्मित आफैं गम्भीर घाइते भएर जीवन–मृत्युको संघर्षमा रहेको बेला पनि आफ्नो ज्यानको पर्वाह नगरी यात्रुको सुरक्षालाई प्राथमिकता दिएको बताए। उनले क्याप्टेन स्मितको साहसिक कदमले १४० करोड भारतीयको शिर उँचो बनाएको समेत बताए। क्याप्टेन स्मितले मोदीलाई घटनाको क्रममा आफू लडेको र धेरै चोट लागेको बताए। उनले विमानभित्रको अवस्था बिग्रिरहेको महसुस गरेको बताए। ‘मलाई लाग्यो, यदि म उठिनँ र कुनै कदम चालिनँ भने अवस्था अझ खराब हुन्छ। म १७ वर्षदेखि विमान उडाइरहेको छु, र पछिल्लो ११ वर्षदेखि क्याप्टेन छु,’ स्मितले भने।
क्यापेन स्मितले अन्तिम प्रयास गर्दै ककपिटको ढोका खोलेपछि अन्य मानिसहरू त्यहाँ आउन सकेको बताए। उनले यो प्रयासमा अन्य व्यक्तिहरूको पनि महत्वपूर्ण भूमिका रहेको बताएका छन्। ‘म आफ्नो ज्यान बचाउने हिसाबले अघि बढिरहेको थिएँ, तर त्यही समयमा मलाई थाहा थियो कि म ती मानिसहरूलाई मर्न दिन सक्दिनँ,’ उनले भने। मोदीले क्यापेन स्मितका बुवा भूपेन्द्रभाइ, आमा गीताबेन र पत्नी सोनलबेनसँग भएको कुराकानीको पनि उल्लेख गरे। गीताबेनले स्मितलाई राम्रो संस्कार दिएको भन्दै उनले प्रशंसा गरे। मोदीले क्यापेन स्मितको उपचार र हेरचाहका लागि साउदी अरब र यूएई सरकारलाई पनि धन्यवाद दिए।
क्यापेन स्मितले आफ्नो चोटलाई केवल घाउका रूपमा नलिएको बताए। उनले यसलाई बिस्तारै निको हुने एउटा यात्राका रूपमा लिएको र आफू पूर्ण रूपमा स्वस्थ हुनेमा विश्वस्त रहेको बताए। मोदीले सावरकुण्डलासहित देशका विभिन्न स्थानमा क्यापेन स्मितको दीर्घायु र शीघ्र स्वास्थ्यलाभका लागि पूजाआजा भइरहेको बताए। उनले पूरै भारत क्यापेन स्मित स्वस्थ भएर फर्किएको हेर्न प्रतीक्षारत रहेको पनि बताए।
