१६ असोज, काठमाडौं । आईसीसी पुरुष टी–२० विश्वकप २०२८ को एसियाली छनोट अन्तर्गत मलेसियामा आगामी सातादेखि दुई उपक्षेत्रीय छनोट प्रतियोगिता सुरु हुन लागेका छन्। उपक्षेत्रीय छनोट ‘ए’ र ‘बी’ अक्टोबर ५ देखि १४ सम्म सञ्चालन गरिनेछन्। दुवै प्रतियोगितामा १३ टोलीले प्रतिस्पर्धा गर्नेछन्। कुल ३६ खेल मलेसियाको बायुएमास ओभल, यूकेएम ओभल र एसटीसी ओभलमा आयोजना गरिनेछ।
उपक्षेत्रीय छनोट ‘ए’ मा बहराइन, भुटान, कुवेत, मंगोलिया, म्यानमार, कतार र थाइल्यान्डले प्रतिस्पर्धा गर्नेछन्। छनोट ‘बी’ मा भने हङकङ, चीन, मलेसिया, माल्दिभ्स, साउदी अरेबिया र सिंगापुर सहभागी हुनेछन्। दुवै प्रतियोगिता एकल राउन्ड रोबिन ढाँचामा सञ्चालन गरिनेछ। प्रत्येक समूहका शीर्ष तीन टोलीले २०२७ मा हुने एसिया छनोटको अर्को चरणमा स्थान सुरक्षित गर्नेछन्।
मलेसियन क्रिकेट संघका अध्यक्ष महिन्दा भालिपुरमले प्रतियोगिता आयोजना गर्नु सम्मानको विषय भएको उल्लेख गरे। उनले यी प्रतियोगिताले एसियाली क्रिकेटको विकास, प्रतिभा र महत्वाकांक्षा प्रस्तुत गर्ने अवसर प्रदान गर्ने बताए। सबै खेल आईसीसी टिभी मार्फत विश्वव्यापी प्रत्यक्ष प्रसारण गरिनेछन्। भारतमा फ्यानकोडमार्फत पनि खेल हेर्न सकिनेछ।
उपक्षेत्रीय छनोट ‘ए’ को पहिलो खेल अक्टोबर ५ मा म्यानमार र भुटानबीच र थाइल्यान्ड र बहराइनबीच हुनेछन्। सोही दिन कुवेत र कतारबीच पनि खेल आयोजना हुनेछ। उपक्षेत्रीय छनोट ‘बी’ को पहिलो खेल अक्टोबर ८ मा हुनेछन्। सो दिन माल्दिभ्स र चीन, साउदी अरेबिया र सिंगापुर तथा मलेसिया र हङकङबीच प्रतिस्पर्धा हुनेछ।
