अमेरिकी राष्ट्रपति ट्रम्पले राष्ट्रिय गुप्तचर प्रमुखलाई नयाँ एआई प्रमुख नियुक्ति गरे

१८ असोज, वाशिङटन (रासस/एएफपी)। अमेरिकी राष्ट्रपति डोनाल्ड ट्रम्पले आइतबार राष्ट्रिय गुप्तचर प्रमुख जे क्लेटनलाई ह्वाइट हाउसको कृत्रिम बुद्धिमत्ता (एआई) सम्बन्धी कार्यदलको नेता नियुक्त गरेका छन्। अनुसन्धानकर्ताहरूले यस प्रविधिको सम्भावित खतराबारे चेतावनी दिइरहेका बेला यो नियुक्ति गरिएको हो। राष्ट्रपति ट्रम्पले सामाजिक सञ्जाल ट्रुथ सोसलमा लेखेका छन्, ‘सुपर इन्टेलिजेन्स फोर्सको नेतृत्व क्लेटनलाई सुम्पेको छु। यसलाई संघीय सरकारको प्रयासमा समन्वय गर्ने जिम्मेवारी दिइएको छ।’ उनले थप भनेका छन्, ‘अमेरिका संसारमा ‘सुपर इन्टेलिजेन्स’मा अग्रणी बनेको होस्। धेरैले भन्छन् यो औद्योगिक क्रान्ति र इन्टरनेटभन्दा ठूलो परिवर्तन हो। यसले सबै अमेरिकीहरूको हित र सुरक्षा गर्नेछ, साथै उनीहरूको जीवनस्तर उकास्नेछ।’

ह्वाइट हाउसले शनिबार २४ वर्षीया रिपोर्टर बेनी रे हार्मनीलाई प्रवक्ता तथा सहायक प्रेस सेक्रेटरी नियुक्त गरेको थियो। उनी ‘रियल अमेरिकाज भ्वाइस’मा ह्वाइट हाउस संवाददाताका रूपमा काम गर्दै आएकी थिइन्। हार्मनीले सोमबारदेखि नयाँ जिम्मेवारी सम्हाल्नेछिन्। उनको नियुक्ति ह्वाइट हाउस प्रेस सेक्रेटरीको पद रिक्त रहेको बेला गरिएको हो। यसअघि प्रेस सेक्रेटरी क्यारोलिन लेभिटले अगस्ट अन्त्यमा यो पदबाट राजीनामा दिइसकेकी थिइन्। ट्रम्प प्रशासनले अहिलेसम्म उनको स्थायी उत्तराधिकारीको नाम घोषणा गरेको छैन। हार्मनी पछिल्लो समयमा ह्वाइट हाउस ‘प्रेस पूल’ का नियमित सदस्य पनि बनेकी थिइन्।