राष्ट्रिय खेलकुद परिषद् (राखेप) ले गुन्जन शाह ठकुरीलाई नेपाल क्रिकेट संघ (क्यान) को सदस्यमा मनोनित गरेको छ। १८ असोज, काठमाडौं। राखेप सदस्य सचिवस्तरीय निर्णयअनुसार गुन्जनलाई क्यानको सदस्यको रुपमा मनोनित गर्ने निर्णय गरिएको हो। नेपाल क्रिकेट संघको विधान २०५५ को परिच्छेद २ को दफा ३ उपदफा (४) अनुसार राखेपबाट संघको पदेन सदस्यमा पदमा मनोनयन गर्ने प्रावधान रहेको छ। सोही व्यवस्था अनुसार राखेपले गुन्जनलाई सदस्य मनोनित गरेको हो।
यसअघि नयाँ सरकार गठन पछि राखेपले छुम्बी लामालाई सदस्यबाट फिर्ता बोलाएको थियो। रिक्त भएको उक्त स्थानमा गुन्जनलाई मनोनित गरिएको हो। उनी यसअघि उद्योग, वाणिज्य तथा आपूर्ति मन्त्री गौरी कुमारी यादवको स्वकीय सचिवको रूपमा कार्यरत थिइन्।
