१९ असोज, काठमाडौं । दशौं राष्ट्रिय खेलकुदको सचिवालय स्थापना गरिएको छ । सुर्खेतको वीरेन्द्रनगरस्थित कर्णाली प्रदेश रंगशाला परिसरमा कर्णाली प्रदेशका मुख्यमन्त्री मंगलबहादुर शाहीले सचिवालयको उद्घाटन गरेका छन् । उद्घाटन समारोहमा कर्णाली प्रदेशका सामाजिक विकास मन्त्री जितबहादुर मल्ल र राष्ट्रिय खेलकुद परिषद्का सदस्य–सचिव रामचरित्र मेहता उपस्थित थिए ।
राष्ट्रिय खेलकुद परिषद् (राखेप)का अनुसार, दशौं राष्ट्रिय खेलकुदलाई व्यवस्थित र प्रभावकारी रूपमा सञ्चालन गर्न मूल आयोजक समितिको सचिवालय यसपटक वीरेन्द्रनगरमा स्थापना गरिएको हो । दशौं राष्ट्रिय खेलकुद आगामी मंसिर १६ देखि २७ गतेसम्म कर्णाली प्रदेशका विभिन्न जिल्लाहरूमा आयोजना हुने तय गरिएको छ ।
