१९ असोज, काठमाडौं । भारत र वेस्ट इन्डिजलाई तीन खेलको एकदिवसीय शृंखलाको अन्तिम खेलमा स्लो ओभर रेटको कारण जरिवाना गरिएको छ । शनिबार नयाँ चण्डीगढमा सम्पन्न खेलमा भारतलाई खेलाडीको म्याच फीको २० प्रतिशत र वेस्ट इन्डिजलाई १० प्रतिशत जरिवाना गरिएको छ । आईसीसीको अन्तर्राष्ट्रिय प्यानल अफ म्याच रेफ्री प्रकाश भट्टले समय छुटको हिसाब गर्दा भारत चार ओभर र वेस्ट इन्डिज दुई ओभर कम फालिएको पत्ता लगाउँदै दुवै टोलीमाथि कारबाही गरेका हुन्।
आईसीसीको आचारसंहिताको धारा २.२२ अनुसार निर्धारित समयमा निर्धारित ओभर पूरा नगरिएमा प्रत्येक ओभरका लागि खेलाडीको म्याच फीको पाँच प्रतिशत जरिवाना लाग्ने व्यवस्था छ । दुवै टोलीका कप्तानले आफ्नो गल्ती स्वीकार गर्दै प्रस्तावित कारबाही स्वीकार गरेपछि औपचारिक सुनुवाइ आवश्यक नरहेको जनाइएको छ । मैदानका अम्पायर जयरामन मदनगोपाल र साम नोगाज्की, तेस्रो अम्पायर शर्फुद्दौला इब्ने शाहिद तथा चौथो अम्पायर विरेन्द्र शर्माले स्लो ओभर रेटको निष्कर्ष निकालेका थिए।
