भारतको ककरोच जनता पार्टी (सीजेपी) ले भोलि दिल्लीको जन्तरमन्तरमा आन्दोलन गर्न आह्वान गरेको छ। पार्टीका सहसंयोजक आशुतोष रांकाले भने कि उनीहरू भोलिबाट शुरू हुने आन्दोलनले इतिहास रच्नेछ। उनले सामाजिक सञ्जाल एक्समा लेखेका छन्, ‘प्रिय ककरोचहरू! अहिलेसम्म तय गरेको लामो यात्रामा मलाई गर्व छ। भोलि जे भए पनि हामी निश्चित रूपमा इतिहास रच्नेछौं।’ उनले संविधान हातमा र गान्धीको विचार हृदयमा राखेर आन्दोलनमा आउन आग्रह गरेका छन्। ‘जे भए पनि हामी हात उठाउने छैनौं,’ उनको भनाइ छ।
त्यसैगरी, सीजेपीका संस्थापक अभिजित दीपकेले भने कि भोलि आफू पक्राउ परे पनि पार्टीले आफ्ना मागमा अडिग रहनुपर्छ। उनले एक्समा लेखेका छन्, ‘यदि भोलि मलाई पक्राउ गरियो पनि हामी आफ्ना मागहरुमा अडिग रहनुपर्छ। हामी देशको लोकतन्त्र बचाउन लडिरहेका छौं। सबैलाई शान्तिपूर्ण रूपमा भोलिको प्रदर्शनमा सहभागी हुन आग्रह गर्दछु।’ उता दिल्ली प्रहरीले सीजेपीलाई जन्तरमन्तरमा प्रदर्शन गर्ने अनुमति दिएको छैन। तर, सीजेपीले मुख्य निर्वाचन आयुक्त ज्ञानेश कुमारको राजीनामा माग्दै भोलिबाट दिल्लीको जन्तरमन्तरमा प्रदर्शन गर्ने घोषणा गरेको छ।
