एनभिडियाका सीईओ जेन्सेन हुआङ र पत्नी लोरीबीच सम्बन्धविच्छेदको सम्भावना, लोरी बन्नेछिन् विश्वकै चौथो धनी महिला

एनभिडियाका सीईओ जेन्सेन हुआङ र उनकी पत्नी लोरीबीच सम्बन्धविच्छेद हुने अड्कलबाजी तीव्र बनेको छ। यदि यी दुईको सम्बन्धविच्छेद भयो भने लोरीले करिब ८० अर्ब डलर पाउन सक्नेछन्, जुन इतिहासकै सबैभन्दा महँगो सम्बन्धविच्छेद सम्झौता हुनेछ। यसका साथै लोरी विश्वकै चौथो धनी महिला पनि बन्नेछिन्। जेन्सेन र लोरीले सन् १९८५ मा विवाह गरेका थिए र उनीहरूका दुई सन्तान छन्।

जेन्सेनले ८ नोभेम्बरमा एक चिनियाँ महिलासँग आफ्नो अफेयर रहेको कुरा स्वीकार गरेका थिए। यद्यपि, लोरीले सम्बन्धविच्छेदलाई लिएर हालसम्म कुनै अभिव्यक्ति दिएकी छैनन्। कानुनअनुसार पत्नीलाई आधा सम्पत्तिको हक छ। जेन्सेन र लोरी अमेरिकी राज्य क्यालिफोर्नियामा बस्छन्, जहाँको कानुनअनुसार, विवाहपछि आर्जन गरिएको सम्पत्तिमा पत्नीको ५० प्रतिशत हिस्सेदारी हुन्छ।

सन् १९९३ मा सुरु भएको एनभिडियाको बजार मूल्य करिब ६५२.५० लाख करोड नेपाली रुपैयाँ छ, जबकि जेन्सेनको व्यक्तिगत सम्पत्ति २३.४६ लाख करोड नेपाली रुपैयाँ छ। यस्तो अवस्थामा लोरीले करिब ११.६० लाख करोड नेपाली रुपैयाँ पाउन सक्नेछिन्। यो सन् २०२१ मा बिल गेट्स र मेलिन्डाबीच भएको ७६ अर्ब डलरको सम्बन्धविच्छेद सम्झौताभन्दा पनि धेरै हुनेछ।

जेन्सेन हुआङले आइतबार एनभिडियाका सबै कर्मचारीहरूलाई एक आन्तरिक सन्देश पठाएका थिए। यसमा उनले आफ्नी पत्नीप्रति इमानदार नरहेको कुरा स्वीकार गरेका छन्। हुआङले लेखेका छन्, ‘मेरो यो कदमले मेरी पत्नी र सन्तानलाई गहिरो चोट पुगेको छ। मलाई यसमा पछुतो छ। मेरो जिम्मेवारी तपाईंहरू सबैको विश्वास कायम राख्नु थियो, तर म यसमा असफल भएँ।’

एलिस हुआङसँगको सम्बन्ध र जासुसी आशङ्कापछि एनभिडियाको सेयर ५ प्रतिशतसम्म घटेको छ। जेन्सेनको सम्पत्ति ११.१४ लाख करोड नेपाली रुपैयाँले घटिसकेको छ। जेन्सेन फोर्ब्सको धनीहरूको सूचीमा दुई स्थान तल झरेर १०औँ स्थानमा पुगेका छन्। यस उथलपुथलका बीच लगानीकर्ताहरू आगामी १७ नोभेम्बरमा आउने कम्पनीको त्रैमासिक नतिजामा नजर टिकाइरहेका छन्। एनभिडिया बोर्डद्वारा पनि छानबिन जारी छ।