ब्रिटिश हवाई अखडामाथि आक्रमणको योजनामा इरानको समर्थन प्राप्त तीन जनाविरुद्ध अमेरिकी अभियोग

अमेरिकी न्याय मन्त्रालयले अमेरिका र युरोपमा भएका शृङ्खलाबद्ध षड्यन्त्रमा संलग्न रहेको भन्दै इरानको समर्थन प्राप्त तीन जनाविरुद्ध अभियोग लगाइएको घोषणा गरेको छ। मन्त्रालयका अनुसार इरानी एजेन्टहरूले हालसालै यूकेस्थित एउटा हवाई अखडामा आतङ्कवादी आक्रमणको योजना बनाएका थिए। उनीहरू यूकेको आरएएफ फेअरफोर्डनजिकै सेप्टेम्बरमा भएको ठूलो घटनामा संलग्न रहेको मन्त्रालयले जनाएको छ। उक्त हवाई अखडालाई अमेरिकी फौजहरूले प्रयोग गर्दै आएका थिए।

इरानी र इराकी दुवै नागरिकता भएका एक व्यक्तिमाथि यसअघि लागेका अभियोगमा मुद्दाको सुनुवाइ पर्खिरहेका बेला न्यूयोर्कको एउटा कारागारबाट ब्रिटेनमा रहेका आफ्ना सम्पर्क व्यक्तिहरूसँग सञ्चार गरेको आरोप छ। अरू दुई जनामाथि पनि इरानमै बसेर त्यसै गरी सञ्चार गरेको आरोप लगाइएको छ। इरानले आरएएफ फेअरफोर्ड घटनामा आफ्नो कुनै पनि संलग्नतालाई स्पष्ट रूपमा अस्वीकार गरेको छ। उक्त घटनाबारे सैन्य अखडानजिकै शङ्कास्पद भ्यानहरू देखिएको सूचना सार्वजनिक भएपछि जानकारी बाहिर आएको थियो।

अमेरिकी न्याय मन्त्रालयका अनुसार इरानी नागरिक मोहसिन मोहाजेरी, इराकी नागरिक मोहम्मद अली अल-हसानी र इरान-इराक दुवै देशको नागरिकता भएका मोहम्मद बाकेर साद दाउद अल-सादीविरुद्ध आरोप लगाइएको मङ्गलवार सार्वजनिक गरिएको आरोपपत्रमा उल्लेख छ। उनीहरूमाथि युरोपमा आक्रमणको योजना बनाएको आरोप छ। ती आक्रमणहरू हर्कत असहाब अल-यमिन अल-इस्लामिया (द इस्लामिक मुभमन्ट अफ द पिपल अफ द राइट ह्यान्ड हायी) नामक कथित नयाँ समूहको नाममा गरिएका थिए।

अमेरिकी न्याय मन्त्रालयले उल्लेख गरेको छ कि सन् २०२६ को वसन्तयाममा युरोपमा भएका र हायीले जिम्मेवारी लिएका १८ वटा आतङ्कवादी आक्रमणमध्ये सात वटा ब्रिटेनमा भएका थिए। ती आक्रमणमा “आगलागी गराउने घटना, विस्फोटक पदार्थको प्रयोग र एउटा घटनामा लन्डनमा दुई जना यहुदी पुरुषमाथि ज्यानै जान सक्ने गरी चक्कु प्रहार गरिएको” मन्त्रालयले जनाएको छ। अमेरिकी वायुसेनाले आरएएफ अखडालाई ‘फोर्वर्ड अपरेटिङ लोकेशन’ का रूपमा दशकौँदेखि प्रयोग गर्दै आएको छ।