एनभिडियाका सीईओ जेन्सन हुआङ चीनका लागि जासुसी गरेको आशंका गरिएकी चिनियाँ व्यवसायी एलिस हुआङसँगको सम्बन्धका कारण अमेरिकी अनुसन्धानमा परेका छन्। न्यूयोर्क टाइम्सका अनुसार अमेरिकी गुप्तचर निकायले एलिस हुआङ र जेन्सन हुआङबीचको कुराकानी फेला पारेपछि एनभिडियाले आन्तरिक अनुसन्धान थालेको छ। जेन्सन हुआङले पत्नीप्रति ‘बेवफाइ’ स्वीकार गर्दै परिवारसँग माफी मागेका छन्। २४ कात्तिक, काठमाडौं।
विश्वकै मूल्यवान प्रविधि कम्पनीमध्येको एक एनभिडियाका प्रमुख कार्यकारी अधिकृत (सीईओ) जेन्सन हुआङ एकैपटक दुई विवादमा तानिएका छन्। चीनका लागि जासुसी गरेको आशंका गरिएकी एक चिनियाँ व्यवसायीसँग उनको निकट सम्बन्ध रहेको अमेरिकी गुप्तचर निकायको दाबी सार्वजनिक भएपछि उनीमाथि अनुसन्धान सुरु भएको छ। यसै क्रममा हुआङले आफ्नी पत्नीलाई धोका दिएको स्वीकार गर्दै परिवारसँग माफीसमेत मागेका छन्।
अमेरिकी अखबार द न्यूयोर्क टाइम्सका अनुसार चिनियाँ व्यवसायी एलिस हुआङलाई चीनको उच्चस्तरीय गुप्तचर निकायले जासुसीका लागि परिचालन गरेको अमेरिकी अधिकारीहरूको आशंका थियो। उनीसँग एनभिडियाका प्रमुख जेन्सन हुआङको निकट सम्बन्ध रहेको सूचनासमेत अमेरिकी गुप्तचर निकायले संकलन गरेको बताइएको छ। यो विषय सार्वजनिक भएसँगै एनभिडियाले घटनाबारे आन्तरिक अनुसन्धान थालेको छ। यद्यपि, कम्पनीले अमेरिकी राष्ट्रिय सुरक्षामा कुनै सम्झौता भएको आफूलाई नलागेको जनाएको छ।
चिनियाँ विदेश मन्त्रालयका प्रवक्ता गुओ जियाकुनले आरोपलाई आधारहीन, अड्कलबाजीमा आधारित र चीनको छवि बिगार्ने उद्देश्यले लगाइएको बताएका छन्। एनभिडियाका प्रमुख जेन्सन हुआङको व्यक्तिगत जीवन र व्यवसायिक जीवनबीचको यो विवादले अमेरिकी राष्ट्रिय सुरक्षा चासोको विषय बनेको छ।
सम्बन्धित खबर
