शिवपुरीस्थित सैनिक कमाण्ड तथा स्टाफ कलेजमा १० देशका ९२ सुरक्षा अधिकृतहरूलाई कमाण्ड तथा स्टाफ तालिम सुरु गरिएको छ। नेपाली सेनाका बलाधिकृत रथी प्रदीप केसीले तालिमको शुभारम्भ गर्दै अनुभव आदान–प्रदान र व्यवहारिक योजना तयार पार्न सक्षम हुने बताए।
तालिममा नेपाली सेनाका ४ महिलासहित ७९ अधिकृत, नेपाल प्रहरी, सशस्त्र प्रहरी र राष्ट्रिय अनुसन्धान विभागका १/१ जना गरी ३ जना, चीनका २ जना र अमेरिका, बेलायत, बंगलादेश, भारत, केन्या, माल्दिभ्स, नाइजेरिया र पाकिस्तानका १/१ जना गरी कुल ९२ जना सहभागी छन्। १४ पुस २०४९ मा सैनिक कमाण्ड तथा स्टाफ कलेज स्थापना गरिएको हो।
यस कलेजबाट हालसम्म १ हजार ३०८ नेपाली सेना, १७ नेपाल प्रहरी, २९ सशस्त्र प्रहरी, २० राष्ट्रिय अनुसन्धान विभाग, १ रक्षा मन्त्रालयका र विभिन्न १३२ अन्य राष्ट्रका गरी कुल १ हजार ५०७ जना शिक्षार्थी अधिकृतहरू तालिम प्राप्त गरिसकेका छन्।
