नेपाल-भारत सीमा: १०० रुपैयाँभन्दा बढी मूल्यका सामान ल्याउँदा भन्सार तिर्नुपर्ने नियमको प्रभाव
भारतबाट किनमेल गरी नेपाल ल्याइने सामानमा भन्सार शुल्क लिने कडाइको व्यवस्था लागू भएपछि सीमावर्ती क्षेत्रका बासिन्दाले घरायसी सामानमा केही सहुलियत दिनुपर्ने माग गरेका छन्। स्थलमार्गबाट सीमा पार गर्ने व्यक्तिलाई भन्सार छुट नदिइने भनी गत जेठमा राजपत्रमा प्रकाशित गरिएको व्यवस्था सरकारले कडाइका साथ लागू गर्न निर्देशन दिएपछि भन्सार अधिकारीहरूले त्यसलाई कार्यान्वयनमा ल्याइरहेका छन्। भारतबाट तेल लगायत खाद्य वस्तुहरू ल्याउन पनि प्रतिबन्ध लगाइएको सर्वसाधारणले जनाएका छन्।
सीमानाकासँगै सुरक्षाकर्मीहरूले रु १०० भन्दा बढी मूल्यका सामान भन्सार तिरेर मात्र ल्याउनुपर्ने विषयमा माइकिङ गर्दै सचेतना गराइरहेका अधिकारीहरूले बताए। भन्सार विभागका प्रवक्ताले यसअघि नै कानुनमा सो व्यवस्था रहेको र अहिले आन्तरिक खरिदलाई प्रोत्साहन गर्ने उद्देश्यका साथ सरकारले उक्त नियमलाई कार्यान्वयनमा ल्याएको बताए।
पहिले यस्ता साना किनमेलमा प्रायः भन्सार नलाग्ने गरिन्थ्यो, तर नयाँ सरकारले जिम्मेवारी सम्हालेपछि नियमलाई कडाइका साथ लागू गर्न थालेको देखिन्छ। सीमाका नाकामा बढेको कडाइको विरोध समेत भइरहेको छ। मधेश प्रदेशका विभिन्न सीमावर्ती क्षेत्रमा सुरक्षाकर्मीहरूले माइकिङमार्फत् सर्वसाधारणलाई १०० रुपैयाँभन्दा बढी मूल्यका सामान ल्याउँदा भन्सार अनिवार्य रुपमा घोषण गर्नुपर्ने सचेतना दिइरहेका छन्।
व्यवसायीहरूले सरकारको निर्णयलाई सकारात्मक रुपमा लिइरहेका छन्। बारा-पर्साका किराना व्यापारी सुमन पौडेलले भने, “सरकारको यो निर्णय सकारात्मक छ, केही असहजता हुन सक्छ तर लामो अवधिमा नेपालको अर्थतन्त्र बलियो बनाउन मद्दत गर्नेछ।” वीरगन्जका कपडा व्यापारी अभिषेक शर्माले भने, “अहिलेको तथ्याङ्क अनुसार वीरगन्ज बजारको व्यापार ८५ प्रतिशतले बढेको छ।”
