सल्यानको बनगाड कुपिण्डे नगरपालिका वडा नम्बर ८ मा जन्ती बोकेको गाडी दुर्घटना हुँदा चार जनाको मृत्यु भएको छ। मृतकमा मनबहादुर थापा, टोपबहादुर थापा, ठगे घर्ती र कर्णबहादुर पुन रहेका छन्। बसमा १८ जना सवार थिए, जसमा १४ जना घाइते भएका छन्। घाइतेलाई विभिन्न अस्पतालमा उपचारका लागि पठाइएको छ।
६ वैशाख, काठमाडौं। सल्यानको बनगाड कुपिण्डे नगरपालिकाको पुथालामा जन्ती बोकेको गाडी दुर्घटना हुँदा मृतकको संख्या ४ पुगेको छ। मृतक सबै बनगाड कुपिण्डे नगरपालिका वडा नम्बर ८ का हुन्। पछिल्लो पटक ३० वर्षीय मनबहादुर थापाको सल्यानको मेहलकुनामा उपचारको क्रममा मृत्यु भएपछि मृतकको संख्या ४ पुगेको जिल्ला प्रहरी कार्यालय सल्यानका इन्सपेक्टर देवराज भट्टराईले जानकारी दिए।
कालीमाटीको लक्ष्मीपुरतर्फ जन्ती बोकेर जाँदै गरेको लु.प्र.०१००१ ज ०२७१ नम्बरको जिप शनिबार साँझ दुर्घटना भएको थियो। उद्धारमा खटिएका वडानम्बर ८ का वडाध्यक्ष कुलबहादुर पुरीका अनुसार जिपमा १८ जना सवार थिए। तीमध्ये १४ जना घाइते छन्। उनीहरुलाई उद्धार गरी सुर्खेतको मेहेलकुना अस्पताल पठाइएको छ। जिल्ला प्रहरी कार्यालय सल्यानका अनुसार ८ जनाको नर्सिङ होममा, दुई जनाको न्युरो अस्पतालमा र अन्यलाई उपचारका लागि बाँके पठाइएको छ।
