आइसीसी विश्वकप लिग २ अन्तर्गत काठमाडौँमा शनिबारदेखि सुरु भएको त्रिकोणात्मक श्रृङ्खलाको पहिलो खेलमा नेपालले यूएईलाई ३७ रनले पराजित गरेको छ। नेपालले अब आगामी सोमबार ओमानसँग प्रतिस्पर्धा गर्नेछ।
टस हारेर पहिले ब्याटिङ गरेको नेपालले ४८.२ ओभरमा अलआउट हुँदै २०० रनको मध्यम स्कोर तयार पारेको थियो। जवाफमा ब्याटिङ गरेको यूएई पनि ४८.२ ओभरमै १६३ रनमा अलआउट भएको थियो। नेपालको लक्ष्य पछ्याउन आएको यूएई एक चरणसम्म सहज जीततर्फ जाँदै गरेको अवस्थामा नेपालले खेल उल्ट्याउँदै जित हात पारेको छ। यस जितसँगै नेपालले लिग तालिकामा १४ अंक जोडेको छ भने पुछारमा रहेको यूएई १० अंकमै अडिएको छ।
यूएईले शनिबारको खेल जितेको भए नेपालसँग बराबरी अंक बनाउन सक्ने स्थिति थियो। करणको ४ विकेटकीर्तिपुर क्रिकेट मैदानमा २०१ रनको लक्ष्य पछ्याउन आएको यूएईले सुरुमा केही समय अनिश्चय देखायो। तर कप्तान मोहम्मद वासिम र अक्षदीप नाथले पाँचौं विकेटका लागि ५३ रनको साझेदारी गरेपछि टोली सहज जीततर्फ अघि बढ़्यो। वासिमले ३४ र अक्षदीपले ३० रन बनाएका थिए।
सोमपाल कामीले यी जोडीको साझेदारी तोडिदिएपछि खेल एकाएक नेपालतर्फ सर्छ। ३३ औं ओभरमा सोमपालले पहिला अक्षदीप र ३५ औं ओभरमा वासिमलाई क्याच आउट गराएका थिए। यी दुबै विकेट सोमपालले शट पिच बलले समातेका थिए। करण केसीले एक्लैले ४ विकेट लिए। अन्तिम विकेट लिएर नेपालको जित सुनिश्चित गर्दा करणले ९.२ ओभरमा १९ रन खर्चेका थिए।
