गुगल फोटोले आर्टिफिसियल इंटेलिजेन्स (एआई) प्रयोग गरी प्रयोगकर्ताहरूको लागि ‘डिजिटल वार्डरोब’ तयार गर्ने नयाँ फिचर सार्वजनिक गर्ने घोषणा गरेको छ। यस फिचरले प्रयोगकर्ताका पुराना फोटोहरू स्क्यान गरी उनीहरूले लगाएका कपडाको आधारमा एक व्यवस्थित डिजिटल दराज तयार पार्नेछ, जसले ‘के लगाउने?’ भन्ने चिन्ता कम गर्न मद्दत गर्ने विश्वास गरिएको छ।
यस नयाँ फिचरका मुख्य विशेषताहरू यसप्रकार छन– कपडाहरूको स्वचालित वर्गीकरण: गुगल फोटोको एआईले तपाईँका फोटो लाइब्रेरीबाट कपडा पहिचान गरी ‘वार्डरोब’ सँग्रहमा समेट्नेछ। यसमा गरगहना, सर्ट, पाइन्ट लगायत विभिन्न प्रकारका कपडाहरूलाई छान्न सकिनेछ, जसले पुराना झुण्डिएको कपडा सहजै फेला पार्न सहयोग पुर्याउनेछ।
भर्चुअल ट्राइ-अन: कपडा लगाउनु पूर्वै त्यो कस्तो देखिन्छ भनी हेर्न यसमा ‘भर्चुअल’ परीक्षण सुविधा उपलब्ध छ। प्रयोगकर्ताले फरक-फरक कपडाका टुक्रा छनौट गरी ‘Try it on’ बटन थिचेर त्यसको डिजिटल पूर्वावलोकन हेर्न सक्नेछन्।
आउटफिट मिक्स एन्ड म्याच: प्रयोगकर्ताले आफ्नै डिजिटल वार्डरोबबाट विभिन्न कपडा मिसाएर नयाँ ‘आउटफिट’ तयार गर्न सक्नेछन्। यस्ता संयोजनहरूलाई विभिन्न अवसरहरू (जस्तै: विवाह, अफिस, वा भ्रमण) अनुसार मूडबोर्डमा बचत वा साथीहरूसँग सेयर पनि गर्न सकिनेछ। यो नयाँ फिचर यसै वर्ष ग्रीष्म ऋतुमा पहिला एन्ड्रोइड र पछि आईओएस प्रयोगकर्ताका लागि उपलब्ध गराइनेछ।
