कुशल भुर्तेल १७ स्थान उक्लेर शीर्ष १०० ओडीआई ब्याटरमा स्थान बनाउन सफल
नेपाली क्रिकेट टिमका ओपनिङ ब्याटर कुशल भुर्तेल आईसीसीको एकदिवसीय अन्तर्राष्ट्रिय (ओडीआई) ब्याटिङ वरियतामा शीर्ष १०० मा प्रवेश गरेका छन्। यसअघि आसिफ शेख र दीपेन्द्रसिंह ऐरी शीर्ष १०० मा रहेका थिए। भुर्तेलले १७ स्थान उक्लेर १००औं स्थान हासिल गरेका हुन्।
६ जेठ, काठमाडौं। घरेलु मैदानमा भएको ओमान र यूएईसँगको लिग २ शृङ्खलामा दुई खेल खेलेका भुर्तेल बिहान खेलमा ड्रप भएका थिए। त्यसपछि स्कटल्यान्ड र अमेरिकाविरुद्धको शृङ्खलामा पहिलो खेल नखेलेका उनी दोस्रो खेलमा मौका पाएपछि शतक बनाउन सफल भए। भुर्तेलको उत्कृष्ट शतकले नेपाललाई अमेरिका विरुद्धको खेलमा सहज जित दिलाउन ठूलो मद्दत पुर्यायो।
बुधबारको अद्यावधिक अनुसार आसिफ शेख ८७औं स्थानमा छन् भने दीपेन्द्रसिंह ऐरी ९९औंमा रहेका छन्। आसिफले ७ स्थान सुधार गरेका छन् भने दीपेन्द्र यथास्थितिमा छन्। अलराउन्डर वरियतामा दीपेन्द्र २५औं स्थानमा र बलिङ वरियतामा सन्दीप लामिछाने ३६औं स्थानमा रहेका छन्।