जन्मदेखि नै दृष्टिविहीन सम्राटले स्क्रिन रिडर सफ्टवेयरको सहायताबाट मोबाइल र कम्प्युटर सजिलै सञ्चालन गर्दै आएका छन्। यात्रा गर्दा उनी गुगल म्याप्स र स्क्रिन रिडरको मद्दतले नयाँ स्थानहरूमा आत्मविश्वाससाथ पुग्ने गर्छन्। प्रविधिको प्रयोगद्वारा उनले कम्प्युटरमा कोडिङ गर्ने र सङ्गीत सफ्टवेयरको प्रयोग गरेर नयाँ धुनहरू सिर्जना गर्ने गरेका छन्। सम्राट भन्छन्, “म जन्मदेखि पूर्ण दृष्टिविहीन छु। तर, मैले संसारलाई कहिल्यै अन्धकारमै रोकिने ठाउँको रूपमा महसुस गरिनँ। मेरो संसार आवाजहरूले भरिएको छ, प्रविधिको उज्यालोले सजिएको छ, र अनेकौं अनुभवहरूले रंगिएको छ।”
धेरैजना बारम्बार मसँग सोध्छन्- ‘सम्राट, तिमी मोबाइल कसरी चलाउँछौ?’ ‘मेसेज कसरी पढ्छौ?’ ‘फेसबुकमा यति छिटो जवाफ कसरी दिन्छौ?’ ‘कम्प्युटर पनि चलाउँछौ र?’ कहिलेकाहीं त उनीहरूको स्वरमा चकित पार्ने आश्चर्य पनि हुन्छ। उनले हाँस्दै आफ्नो स्क्रिन रिडरको नाम लिन्छन्। “मोबाइलमा टक ब्याक र कम्प्युटरमा एनभीडीए मेरा लागि केवल साधारण सफ्टवेयर होइनन्। यी मेरा कानमा बोल्ने आँखाहरू हुन्।” स्क्रिन रिडरले स्क्रिनमा रहेका प्रत्येक शब्द, बटन, सूचना तथा सन्देशलाई आवाजमा परिणत गर्दछ।
सम्राटले बताएका छन्, “सामाजिक सञ्जाल मेरो लागि केवल समय बिताउने ठाउँ मात्र होइन। यहाँबाट मैले साथीहरू भेटेको छु, नयाँ ज्ञान हासिल गरेको छु, आफ्ना अनुभवहरू बाँडेको छु, र संसारलाई अझ नजिकबाट चिन्ने मौका पाएको छु।” प्रविधि र स्क्रिन रिडरको सहयोगले उनी नयाँ स्थानहरूमा आत्मविश्वाससाथ हिँड्न सक्छन्। गुगल म्याप्सको आवाजले उनलाई मार्गनिर्देशन गर्दछ। उनले भने, “धेरैका लागि नक्शा आँखाले देखिने चित्र मात्र हो। तर मेरो लागि नक्शा आवाजमार्फत बनेको बाटो हो।”
सम्राटले प्रविधिसँगको सम्बन्धलाई सीमित नराख्दै कोडिङ र सङ्गीत सिर्जना गर्ने क्षेत्रमा पनि सक्रिय छन्। उनले भने, “स्क्रिन रिडर मेरो लागि केवल प्रविधि होइन। यो मेरो जीवनको अभिन्न साथी बनिसकेको छ।” प्रविधिको माध्यमबाट आत्मनिर्भरता र स्वतन्त्रता हासिल गरेको अनुभव साझेदारी गर्दै उनले थपे, “मैले बुझेको छु- वास्तविक दृष्टि आँखामा मात्र होइन, सोचमा, आत्मविश्वासमा र सिक्ने इच्छाशक्तिमा हुन्छ।”
सम्बन्धित खबर
