समाचार संक्षेपमा, फिफा विश्वकप २०२६ को राउण्ड अफ ३२ मा आज पाँच पटकको विजेता ब्राजिल र एसियाली शक्ति जापानबीच प्रतिस्पर्धा हुँदैछ। नेपाली समयअनुसार राति पौने ११ बजे सुरु हुने यस खेलमा जापानले एसियाको मान-सम्मान सुरक्षित राख्ने जिम्मेवारी बोकेको छ। ब्राजिल र जापान दुवै टोली समूह चरणमा अपराजित रहँदै नकआउट चरणमा प्रवेश गरेका छन्। १५ असार, काठमाडौं।
फिफा विश्वकप २०२६ अन्तर्गत राउण्ड अफ ३२ को दोस्रो खेलमा आज पाँच पटकको विश्व विजेता ब्राजिल र एसियाली शक्ति जापानबीच प्रतिस्पर्धा हुँदैछ। यो खेल नेपाली समय अनुसार राति पौने ११ बजे ह्युस्टन स्टेडियममा सुरु हुनेछ। विश्वकप र विश्व फुटबलकै पर्याय बनेको ब्राजिल र एसियाको पावर हाउसको रुपमा रहेको जापानबीचको यस खेल निकै प्रतिक्षाको विषय बनिसकेको छ। यस विश्वकपमा एसियाबाट नकआउट चरणमा प्रतिनिधित्व गर्ने टिमको रुपमा जापानसँगै एसियाको कोटाबाट खेल्दै आएको अस्ट्रेलिया पनि छ।
ब्राजिल समूह सी को विजेता बन्दा जापान समूह एफ को उपविजेताको रुपमा राउण्ड अफ ३२ मा प्रवेश गरेको हो। यो खेल एसियाका लागि मात्र नभएर विश्वभरका फुटबल प्रेमीहरूका लागि पनि अत्यन्त प्रतिक्षित बनेको छ। यस खेलको विजेता अन्तिम १६ मा आइभरी कोस्ट र नर्वेबीचको खेलको विजेतासँग भिड्नेछ। सन् २००२ मा जापान र दक्षिण कोरियामा संयुक्त रूपमा आयोजना भएको विश्वकपपछि ब्राजिलले नयाँ विश्वकप उपाधि जित्न सकेको छैन। यस पटक छैटौं उपाधि जित्ने लक्ष्यमा रहेको छ ब्राजिल। जापान अहिलेसम्म अन्तिम १६ बाट अघि बढ्न सकेको छैन।
यदि जापानले ब्राजिललाई स्तब्ध पार्न सकेमा त्यो एक ऐतिहासिक उपलब्धि हुनेछ। जापान लगातार तेस्रो र पछिल्ला सात विश्वकपमा पाँचौं पटक नकआउट चरणमा प्रवेश गरेको हो। समूह चरणको प्रदर्शन पाँच पटक विश्वकप जितिसकेको ब्राजिल आफ्नो समूहमा स्वाभाविक दावेदार थियो। पहिलो खेलमै मोरक्कोसँग केही संघर्ष गरे पनि १-१ को बराबरी खेलेको थियो। त्यसपछि ब्राजिलले हाइटी र स्कटल्यान्डलाई समान ३-० ले पराजित गर्यो।
जापानले पनि समूह चरणमा उत्कृष्ट प्रदर्शन गर्यो। जापान नेदरल्यान्ड्सको पछि रहेर समूह एफ को उपविजेता बनेको थियो, एक जित र दुई बराबरीको नतिजा सहित। हेड टु हेड ब्राजिल र जापानबीच अहिलेसम्म १४ खेल भएको छ, जसमा ११ खेल ब्राजिलले जितेको छ। विश्वकपमा ब्राजिल र जापान दोस्रो पटक आमनेसामने हुन लागेका छन्।
