३ चैत, काठमाडौं । अमेरिकी नौसेनाले आफ्ना युद्धपोतहरूको मर्मतसम्भार र रेखदेखलाई तीव्र बनाउन पिट्सबर्गस्थित ‘गेको रोबोटिक्स’सँग अहिलेसम्मकै ठूलो सम्झौता गरेको छ ।

मंगलबार सार्वजनिक गरिएको सूचना अनुसार यो पाँच वर्षे सम्झौताको मूल्य ७ करोड १० लाख डलर बराबर रहेको छ ।

यस अन्तर्गत पहिलो चरणमा ५ करोड ४० लाख डलरको बजेट विनियोजन गरिएको छ । नौसेनाले विशेषगरी प्रशान्त क्षेत्रमा रहेका १८ वटा युद्धपोतहरूको स्थिति निगरानी गर्न यी रोबोट र सेन्सरहरूको प्रयोग गर्नेछ ।

गेको रोबोटिक्सका संस्थापक जेक लुसारारियनका अनुसार यी रोबोटहरूले जहाजका प्रत्येक भागमा पुगेर विस्तृत विवरण संकलन गर्नेछन् र त्यसको आधारमा ‘डिजिटल ट्विन’ तयार गरिनेछ ।

यस प्रविधिले जहाजमा समस्या आउनुअघि नै मर्मतका लागि सुझाव दिनेछ, जसले गर्दा समय र लागत दुवै बचत हुनेछ । हाल अमेरिकी नौसेनाका ४० प्रतिशत जहाजहरू मर्मतका कारण प्रयोगविहीन छन् ।

नौसेनाले सन् २०२७ सम्ममा ८० प्रतिशत जहाजहरूलाई सदैव तत्पर अवस्थामा राख्ने लक्ष्य लिएको छ, जसमा यो रोबोटिक्स प्रविधि कोसेढुङ्गा सावित हुने अपेक्षा गरिएको छ ।