विपद् उद्धारका लागि दुई वटा हेलिकप्टर तयारी अवस्थामा राखिने : गृहमन्त्री गुरुङ
काठमाडौं । गृहमन्त्री सुधन गुरुङले विपद्को समयमा प्रभावित नागरिकलाई तत्काल उद्धार गर्न दुई वटा हेलिकप्टर तयारी अवस्थामा राखिने बताएका छन्। चैत १७ गते सशस्त्र प्रहरी बल नेपाल प्रधान कार्यालयको निरीक्षण भ्रमणको क्रममा उनले यसबारे जानकारी दिएका हुन्। विपद् व्यवस्थापनमा सशस्त्र प्रहरीका कर्मचारीहरू आफ्नो जीवन जोखिममा पार्दै उद्धार कार्यमा खटिने विषयमा गृहमन्त्री गुरुङले धन्यवाद व्यक्त गरे। सामान्य नागरिकको जीवनभन्दा ठूलो कुनै धन छैन भन्दै उनले आपतकालीन अवस्थामा नागरिकको सेवा तथा सुरक्षा गर्न नेपाल सरकार, गृहमन्त्रालय र सुरक्षाकर्मीहरूलाई सदैव तयारी अवस्थामा रहन निर्देशन दिएका छन्।
सशस्त्र प्रहरीले विगतमा विपद् व्यवस्थापन तालिम लिएको स्मरण गर्दै, कोभिड–१९ महामारी र सीमा नाका क्षेत्रमा नेपालको राष्ट्रिय झण्डा ओढाउने काममा सुरक्षाकर्मीहरू नजिकबाट संलग्न रहेका कारण उनको कर्तव्य, अधिकार र कष्टबारे गृहमन्त्रीलाई राम्रो जानकारी भएको उल्लेख गरे। उनले सशस्त्र प्रहरी बल नेपालको कर्मचारीहरूलाई सबै प्रकारका विपद् सुरु हुनासाथ तयारी अवस्थामा रहन निर्देशन दिए। वर्तमानमा जनशक्ति ब्यारेकमा नभई फिल्डमै रहनुपर्नेमा जोड दिँदै विपद् व्यवस्थापनमा व्यापक मेहनत गर्नुपर्ने बताए।
सीमा क्षेत्रबाट हुने अवैध चोरीपैठारी र तस्करी रोक्न गृहमन्त्रीले मन्त्रालयले कडा रूपमा काम गर्ने प्रतिबद्धता सुनाए। सशस्त्र प्रहरीका कर्मचारीहरूलाई लामो समयसम्म एउटै पदमा कार्यरत रहनुपर्ने बाध्यतालाई अन्त्य गर्न मन्त्रालय पहल गर्ने जानकारी उनले दिएका छन्। देशका नागरिक र सुरक्षाकर्मीका लागि केही गर्न आफू मन्त्रालयमा आएको भन्दै गृहमन्त्री गुरुङले सशस्त्र प्रहरीका सेवा सुविधाहरू जस्तै सरुवा, बढुवा लगायतका अवसरहरू पारदर्शी रूपमा प्रदान गरिने स्पष्ट पारे।
सोही अवसरमा सशस्त्र प्रहरी महानिरीक्षक राजु अर्यालले गृहमन्त्रीको निर्देशनले कर्मचारीहरूको मनोबल उच्च बनेको र कार्य क्षेत्रमा अनुशासित तथा परिणाममुखी काम गर्न थप प्रेरणा मिलेको बताए। उनले भने, “अधिकार बिना कार्य क्षेत्रमा राम्रो नतिजा दिन सकिँदैन, त्यसैले सशस्त्र प्रहरी बलको क्षमता अभिवृद्धिका लागि २०५८ को विशेष नियमावली संशोधन आवश्यक छ।” महानिरीक्षक अर्यालले तलका तहका कर्मचारीहरूले तलब र सुविधाबाट जीवनयापन गर्न कठिनाइ भोग्नु परिरहेको उल्लेख गर्दै सरकारले तिनका परिवार र बालबालिकाको शिक्षा तथा स्वास्थ्य निःशुल्क गरिदिएमा जागिर छोडेर विदेश जानुपर्ने अवस्था टर्ने बताए। कार्यक्रममा गृहसचिव राजकुमार श्रेष्ठ, सशस्त्र प्रहरी नायब महानिरीक्षक विष्णु प्रसाद भट्ट, अतिरिक्त महानिरीक्षक नारायणदत्त पौडेल, बंशीराज दाहाल, गणेश बहादुर ठाडामगर लगायत अधिकृत र जवानहरू उपस्थित थिए।