२३ चैत, काठमाडौं। नेपाल निर्माण व्यवसायी महासंघका नवनिर्वाचित पदाधिकारी र कार्यसमिति सदस्यहरूले सोमबार बिहान अनामनगरस्थित महासंघको केन्द्रीय कार्यालयमा पद तथा गोपनीयताको शपथ ग्रहण गरेका छन्। अध्यक्षसहित सबै पदाधिकारी र सदस्यहरूले महासंघको गरिमालाई उच्च राख्दै निर्माण क्षेत्रमा विकास गर्दै व्यवसायीहरूको हकहितमा प्रतिबद्ध भएर काम गर्ने प्रतिबद्धता व्यक्त गरेका छन्। अधिवेशनले आगामी कार्यकालका लागि नयाँ नेतृत्व चयन गरेको छ।
शपथ ग्रहण कार्यक्रममा महासंघका पूर्व अध्यक्षहरू, विभिन्न जिल्ला तथा प्रदेशका व्यवसायीहरू र सरोकारवाला निकायका प्रतिनिधिहरूको उपस्थिति रहेको थियो। नवनिर्वाचित कार्यसमितिले आजैबाट आफ्नो कार्यभार सम्हाल्ने महासंघले जानकारी दिएको छ। निर्मित्त क्षेत्रका वर्तमान चुनौतीहरू, भुक्तानी समस्या र नीतिगत सुधारका विषयमा नयाँ कार्यसमितिले प्राथमिकता दिएर काम गर्ने अपेक्षा गरिएको छ। महासंघको १३औं अधिवेशनले व्यवसायीहरूबीच एकता र सहकार्यको नयाँ सन्देश प्रवाह गरेको व्यवसायीहरूले बताएका छन्।
नेपाल निर्माण व्यवसायी महासंघको अध्यक्षमा निकोलश पाण्डे विजयी भएका छन् भने महासचिवमा शिवहरी घिमिरे निर्वाचित भएका छन्। कोशी प्रदेश उपाध्यक्षमा धिरेन्द्र दाहाल, मधेश प्रदेश उपाध्यक्षमा शम्भु ठाकुर, बागमती प्रदेश उपाध्यक्षमा बालकृष्ण थापा, गण्डकी प्रदेश उपाध्यक्षमा खिमप्रकाश मल्ल, लुम्बिनी प्रदेश उपाध्यक्षमा शहदेव खड्का, कर्णाली प्रदेश उपाध्यक्षमा हिमबहादुर बुढा र सुदूरपश्चिम प्रदेश उपाध्यक्षमा प्रकाशबहादुर शेट्टी विजयी भएका छन्। नीतिगत उपमहासचिवमा मंगल शाही र आन्तरिक उपमहासचिवमा सन्तोष साह विजयी भएका छन्। महिलातर्फ उपाध्यक्षमा गङ्गा पोखरेल विजयी भएकी छन् भने कोषाध्यक्षमा उज्वल गौतम र सहकोषाध्यक्षमा उपेन्द्र घिसिङ विजयी भएका छन्।
