२०८२ सालको अन्तिम कारोबार दिन सेयर बजार ४.१८ अंकले घटेर २८३३ अंकमा झरेको छ। आज १०५ कम्पनीको मूल्य बढ्दा १५३ को घटेको र १२ कम्पनीको मूल्य स्थिर रहेको छ। ६ कम्पनीको मूल्य १० प्रतिशतले बढेकोमा सुपर खुदी हाइड्रोपावर र सूर्यकुन्ड हाइड्रो इलेक्ट्रिक समावेश छन्। ३० चैत, काठमाडौं।
सेयर बजारको कारोबार रकम पनि केही घटेको छ। अघिल्लो दिन ८ अर्ब ९९ करोडको कारोबार भएकोमा आज ८ अर्ब ६६ करोडको कारोबार भएको छ। होटल तथा पर्यटन समूह सबैभन्दा धेरै १.०२ प्रतिशतले बढेको छ। त्यस्तै हाइड्रोपावर ०.६६, लगानी ०.१३, उत्पादन तथा प्रशोधन ०.४० र निर्जीवन बीमा ०.४६ प्रतिशतले बढेका छन्।
बैंकिङ ०.४७, विकास बैंक ०.५५, फाइनान्स ०.२९, जीवन बीमा ०.४६, माइक्रोफाइनान्स ०.४२, अन्य १.६२ तथा व्यापार ०.२१ प्रतिशतले घटेको छ। ६ कम्पनीको मूल्य १० प्रतिशतले बढेको छ। १० प्रतिशतले बढेका कम्पनीमा सुपर खुदी हाइड्रोपावर, सूर्यकुन्ड हाइड्रो इलेक्ट्रिक, होटल फरेस्ट इन, पाल्पा सिमेन्ट, रिजलाइन इनर्जी र शिखर पावर रहेका छन्।
मेन्छियाम हाइड्रोपावरको मूल्य ९.०१, उपकार लघुवित्तको ७.१७ तथा नेसनल हाइड्रोपावरको मूल्य ६.६७ प्रतिशतले बढेको छ। युनिक नेपाल लघुवित्तको ३.६०, अभियान लघुवित्तको २.९७ तथा सान्भी इनर्जीको २.९६ प्रतिशतले मूल्य घटेको छ। आज धेरै कारोबार भएका कम्पनीमा नेसनल हाइड्रोपावर, रिडी पावर, रिलायन्स स्पिनिङ मिल्स, आँखुखोला जलविद्युत् कम्पनी र एसवाई प्यानल रहेका छन्।
