राष्ट्रिय योजना आयोगले आयोजना बैंकमा प्रविष्टि गर्ने समयसीमा १० वैशाखसम्म लम्ब्याएको छ। आयोगले ३० चैतमा सम्पन्न बैठकमा मन्त्रालय र निकायका मागअनुसार समय थप गर्ने निर्णय गरेको हो। आर्थिक वर्ष २०८१ का नयाँ आयोजना चालू आवको फागुन मसान्तसम्म योजना बैंकमा प्रविष्टि गर्नुपर्ने व्यवस्था रहेको छ।
राष्ट्रिय आयोजना बैंक (कार्य सञ्चालन तथा व्यवस्थापन) मापदण्ड २०८१ अनुसार आगामी आर्थिक वर्षमा कार्यान्वयन हुने नयाँ आयोजना चालू आवको फागुन मसान्तसम्म आयोजना बैंकमा दर्ता गर्नुपर्ने व्यवस्था छ। आयोगले पहिले १ चैतमा तोकिएको समयसीमा २२ चैतसम्म पुर्याएको थियो। तर, विषयगत मन्त्रालय तथा निकायहरूले पूर्वतयारीका लागि थप समय आवश्यक भएको भन्दै मौखिक अनुरोध गरेपछि ३० चैतमा बसेको आयोगको बैठकले यो समय १० वैशाखसम्म थप गर्ने निर्णय गरेको हो। यसअघि आयोगले तोकिएको ढाँचामा आयोजना प्रविष्टि नभएको भन्दै मन्त्रालय र निकायहरूलाई सच्याउन निर्देशन दिएको थियो।
