५ वैशाख, सिरहा। पूर्व–पश्चिम राजमार्गअन्तर्गत पर्ने सिरहाको गोलबजार व्यस्त बजार क्षेत्र हो, जहाँ दैनिक हजारौं सवारीसाधन र सर्वसाधारणको आवतजावत हुन्छ। यही भिडभाडयुक्त क्षेत्रमा हाटबजार लाग्छ। सडकमै लाग्ने हाटबजारका कारण दुर्घटनाको जोखिम बढ्दै गएको भन्दै स्थानीयले चिन्ता व्यक्त गरेका छन्। प्रत्येक मंगलबार र शनिबार लाग्ने हाटबजारमा सागसब्जी, फलफूल, भाडाकुँडा र कपडा बिक्री हुन्छ। सडककै दायाँबायाँ यसरी हाटबजार सञ्चालन हुँदा सवारी सञ्चालन प्रभावित हुने हुनाले पैदलयात्रीसमेत जोखिममा पर्ने गरेको छ। गोलपार्क चोकदेखि करिब पाँच सय मिटर पश्चिम इलाका प्रहरी कार्यालय गोलबजार अगाडि सम्म फैलिने हाटबजारले सडक साँघुरो बनाउने गरेको स्थानीयहरूको गुनासो छ।
स्थानीय रामबाबु यादवका अनुसार नगरपालिकाले व्यापारी र किसानसँग बट्टीको नाममा राजस्व उठाए पनि बजारको सुरक्षा र व्यवस्थापनमा पर्याप्त ध्यान दिएको छैन। आर्थिक वर्ष २०८२ देखि २०८५ सम्मका लागि गुदरी हाटबजारले एक करोड २४ लाख ३० हजार रुपैयाँमा तीन वर्षका लागि ठेक्का पाएको छ। प्रत्येक वर्ष ४१ लाख १४ हजार रुपैयाँ नगरपालिकाले उठाए पनि बजार व्यवस्थापनमा त्यसको प्रभाव नदेखिएको स्थानीयहरूले आरोप लगाएका छन्। यति ठूलो रकम ठेक्कामा उठ्छ, तर सडकमै जोखिम मोलेर किनमेल गर्नुपर्ने अवस्था उस्तै छ, उनले गुनासो गरे।
गोलपार्क चोक नजिकै पूर्वतर्फ म्याजिक, विंगर, बस तथा टेम्पो स्टेन्ड र पश्चिमतर्फ हाटबजार लाग्ने हुँदा थप जोखिम बढेको स्थानीय प्रमोदकुमार सिंह बताउँछन्। सडक क्षेत्रमा पसलहरू, ठेलागाडा र तरकारी व्यवसायको कारण पैदलयात्रीलाई हिँड्न समेत समस्या भइरहेको उनको भनाइ छ। बजार व्यवस्थापनका लागि उद्योग व्यापार संघले एक वर्षअघि नै प्रस्ताव बुझाए पनि कुनै सुनुवाइ नभएको बताएका छन्। उद्योग व्यापार संघका उपाध्यक्ष राकेश गुप्ताले पटक–पटक मौखिक र लिखित रूपमा नगरपालिकालाई जानकारी गराए पनि सुनुवाइ नभएको बताए।
नगरपालिका, उद्योग व्यापार संघ र ट्राफिक प्रहरीको सहकार्यमा विगतमा लाखौं रुपैयाँ खर्चेर बजार व्यवस्थापनको प्रयास गरिएको भए पनि प्रभावकारी कार्यान्वयन हुन नसकेको आरोप छ। हालसम्म बजार व्यवस्थापनका लागि नगरपालिकाले दुई पटक प्रयास गरेका र करिब १० लाख रुपैयाँ खर्च गरिसकेको बुझिएको छ। तर ठेक्काबाट वार्षिक लाखौं राजस्व उठे पनि बजार अझै अव्यवस्थित रहनुले प्रश्न उठाएको छ। नगरपालिकाका प्रवक्ता तथा वडा नम्बर–६ का अध्यक्ष सञ्जित लामाले बजार व्यवस्थापनका लागि सर्वदलीय बैठक राखिए पनि समाधान ननिस्किएको स्वीकार गरे। उनका अनुसार पुनः सर्वदलीय बैठकमार्फत समाधान खोज्ने प्रयास भइरहेको छ। यता जिल्ला ट्राफिक प्रहरी कार्यालय लहानका प्रमुख ट्राफिक प्रहरी निरीक्षक शालिकराम तिमिल्सिनाले हाटबजार लाग्ने दिन ट्राफिक प्रहरी परिचालन गरिएको बताए। तर स्थानीयहरूले ट्राफिक प्रहरी व्यवस्थापनभन्दा राजस्व संकलनमै बढी केन्द्रित हुने गरेको आरोप लगाएका छन्।
