खोटाङका रमेश दाहालले अमेरिकाको नर्थ क्यारोलाइना राज्यको चापलहिलमा ममज मास्टर नामक नेपाली रेस्टुरेन्ट स्थापना गरी मम मास्टरको पहिचान बनाएका छन्। नेपालका ममलाई अमेरिकाको सहरमा प्रसिद्ध बनाएकै खोटाङका रमेश दाहालले अमेरिकामा मम मास्टरको परिचय स्थापित गरेका छन्। अमेरिकाको दक्षिणपूर्वी राज्य नर्थ क्यारोलाइना राजधानी राले नजिकै चापलहिलमा ३४ हजार विद्यार्थी रहने युएनसी चापल हिल (युनिभर्सिटी अफ चापल हिल) छ। १७८९ मा स्थापना भएको यो अमेरिकाको सबैभन्दा पुरानो सार्वजनिक विश्वविद्यालय हो। यही विश्वविद्यालयको छेउमै एक चर्चित नेपाली रेस्टुरेन्ट छ – ममज मास्टर। कम नेपाली संख्या भएपनि चापल हिलमा ममज मास्टरमा निकै भीड लाग्ने गरेको छ। ‘कहिले कतै लाइन बसेर पनि खानुपर्छ,’ युएनसी चापल हिलमा कार्यरत डा. मुकेश अधिकारी भन्छन्, ‘अमेरिकनहरूको बीचमा बसेर मम खान पाउँदा साँच्चिकै गर्वको अनुभव हुन्छ।’
अमेरिकामा अधिकांश नेपालीहरूले इन्डियन नाम लगाएर भारतीय खाना बेच्ने रेस्टुरेन्ट चलाउँछन्। किनभने भारतीय खाना यहाँ निकै लोकप्रिय छ र इन्डियन नामले सजिलै ग्राहक आकर्षित हुन्छ। धेरैले नेपाली खाना चिन्न समेत सक्दैनन्। तर खोटाङ माक्पाका रमेश दाहालले पाँच वर्षअघि अमेरिकामा नेपाली ममको नाममा रेस्टुरेन्ट खोल्ने साहस देखाए। ‘नेपाली खानालाई यहाँ चिनाउन म नेपाली रेस्टुरेन्ट सञ्चालन गरेको हुँ,’ रमेश सुनाउँछन्, ‘सुरुवाती दिनहरू संघर्षपूर्ण थिए, तर अहिले यही रेस्टुरेन्टले मलाई फरक पहिचान दिएको छ।’ उनले सञ्चालन गरेको ममज मास्टर हिमालयन बिस्ट्रो नेपाली स्वादको प्रतिनिधि स्थल बनेको छ र स्थानीय समुदायका लागि प्रमुख आकर्षणको केन्द्र पनि बनेको छ। त्यसैले धेरैले उनलाई ममता मम मास्टर भनेर प्रेमपूर्वक सम्बोधन गर्छन्।
चापल हिलका नेपाली सम्मान बर्गर, टाको, पिज्जा, हट डगजस्ता खानामा अभ्यस्त अमेरिकनहरू ममको स्वादमा रमाउँछन्। रमेश भन्छन्, ‘पैसा त महत्त्वपूर्ण कुरा हो, तर सबैभन्दा ठूलो उपलब्धि अमेरिकनहरूलाई नेपाली स्वादसँग परिचित गराउनु हो।’ चापलहिल शहरको लोकप्रिय रेस्टुरेन्टमा ममज मास्टर पनि पर्छ। पछिल्ला वर्षहरूमा यो नेपाली मम चिनाउने प्रमुख केन्द्र बनेको छ। ‘यस शहरमा मम परिकार चल्तीको खाना हुनु हामी नेपालीका लागि गर्वको कुरा हो,’ ड्युक विश्वविद्यालयका प्रोफेसर तथा वातावरणविद् डा. चन्द्र गिरी भन्छन्, ‘यहाँको भीडभाड देख्दा गर्व लाग्छ र यसको श्रेय रमेश दाहाललाई जान्छ।’
