नेपालले ओमान विरुद्धको खेलमा टस जितेर पहिले ब्याटिङ गर्ने निर्णय गरेको छ। कप्तान रोहित पौडेलले टस जितेर यो निर्णय गरेका हुन्। २२ वैशाख, काठमाडौं। लिग २ क्रिकेट अन्तर्गत ओमान विरुद्धको खेलमा नेपालले टस जितेको छ। नेपालले आफ्नो कमजोरी सुधार गर्दै पहिलो खेलको हारको बदला लिएर शृंखलामा तेस्रो जित निकाल्ने र सुखद अन्त्य गर्ने लक्ष्य राखेको छ।
नेपालले आगामी सातादेखि लिग २ का शीर्ष २ टोली अमेरिका र स्कटल्यान्डसँग खेल्नेछ। त्यसका लागि जारी शृंखलाको लय महत्त्वपूर्ण हुनेछ। लिग २ अंकतालिकामा हाल ओमानले २७ खेलमा ३१ अंक जोडेर तेस्रो स्थान कायम गरेको छ भने नेपाल २३ खेलमा १६ अंकसहित सातौं स्थानमा छ। अर्को टोली यूएईको २४ खेलमा १४ अंक छ। यसअघि भएको पहिलो खेलमा नेपाल ओमानसँग पराजित भएको थियो। नेपालले यूएईसँगको दुवै खेल जितिसकेको छ। अब ओमानलाई पनि हराएर नेपाल शृंखलामा तेस्रो जितको खोजीमा हुनेछ।
नेपाल र ओमान हालसम्म ओडीआई फर्म्याटमा ९ पटक आमनेसामने भएका छन्। यीमध्ये नेपालले ३ खेल जितेको छ, ५ मा पराजित भएको छ र १ खेल रद्द भएको छ। कीर्तिपुरमा यी दुई टोली ४ पटक आमनेसामने भएका छन्, जसमा नेपालले १ खेल जित्दा ओमानले ३ खेल जितेको छ। लिग २ क्रिकेटको अन्तर्गत कीर्तिपुरमा भएका खेलमा नेपालले ओमानलाई हराउन सकेको छैन। कीर्तिपुरमा नेपालले जितेको एक मात्र खेल एसीसी प्रिमियर कप अन्तर्गत थियो।
