१३ असोज, काठमाडौं । एसियन गेम्समा बंगलादेशसँग भएको क्वाटरफाइनल खेल वर्षाको कारण रद्द भएपछि मलेसियाका क्रिकेटर विरानदीप सिंहले सामाजिक सञ्जालमार्फत आफ्नो निराशा प्रकट गरेका छन्। टावल समातेको तस्वीर सेयर गर्दै विरानदीपले भने, “हाम्रो क्वाटरफाइनल खेल रद्द भएको खबर सुन्दा हामी होटलमै थियौं, म टावलमा थिएँ। बंगलादेशविरुद्ध खेल्ने अर्को मौका पाउनका लागि तीन वर्षदेखि पर्खिरहेको थिएँ, तर यसपटक त्यो मौका पनि मिलेन। एसोसिएट क्रिकेट निकै कठिन छ।”
बंगलादेश र मलेसियाबीच तय गरिएको क्वाटरफाइनल लगातार परेको वर्षाका कारण रद्द गरिएको हो। विरानदीपले खेल सुरु हुनु तीन घण्टाअघि नै रद्द हुने खबर पाएको बताएका छन्। खेल हुने कोरोगी स्पोर्ट्स पार्कको क्रिकेट मैदान अहिले पनि पूर्णरूपले छोपिएको छैन। पिच र स्क्वायर मात्रै छोपिएको छ भने आउटफिल्ड खुलेको भएर मैदानमा पानी जमेको छ।
खेल रद्द भएपछि वरीयताको आधारमा बंगलादेश सेमिफाइनलमा प्रवेश गरेको छ। यसअघि आजै श्रीलंका र नेपालबीचको क्वाटरफाइनल भी वर्षाले रद्द भएको थियो भने सोमबार पाकिस्तान र हङकङ तथा भारत र अफगानिस्तानबीचका खेलहरू पनि वर्षाका कारण रद्द भएका थिए। यसले गर्दा वरीयताका आधारमा क्वाटरफाइनल स्थान बनाएका टोलीहरु भारत, पाकिस्तान, श्रीलंका र बंगलादेश सेमिफाइनल पुगेका छन्। नेपाल र अफगानिस्तान समूह ‘ए’ बाट र मलेसिया र हङकङ समूह ‘बी’ बाट क्वाटरफाइनलमा पुगेका थिए। वर्षाका कारण खेल बाधित हुँदा वरीयताले नै सेमिफाइनल प्रवेश गर्ने टोली टुंगो लगाएको हो।
