लोक संगीतमा बढ्दो अश्लीलताविरुद्ध राष्ट्रिय लोक सञ्चारकर्मी नेपालले कठोर नियमनको माग गर्यो
राष्ट्रिय लोक सञ्चारकर्मी नेपालले लोक कला र दोहोरी गीतहरूमा बढ्दो अश्लीलता र विकृतिप्रति गम्भीर आपत्ति जनाएको छ। संस्थाले विवादास्पद कलाकार र प्रस्तुतिमाथि कानुनी कारबाही गर्न सरकारसँग माग गरेको छ। लोक सञ्चारकर्मी नेपालले कलाकारहरूलाई सामाजिक मर्यादा र जिम्मेवारीप्रति सचेत भएर सुसंस्कृत सामग्री मात्र सार्वजनिक गर्न आग्रह गरेको छ। २८ वैशाख, काठमाडौं।
सोमबार संस्थाका अध्यक्ष चन्द्रमणी गौतमको अध्यक्षतामा बसेको आकस्मिक बैठकले सामाजिक मर्यदामा असर पुर्याउने कलाकार र सामग्रीमाथि कडा कारबाहीको आवश्यकता औंल्याएको छ। बैठकले विशेष गरी डिजिटल माध्यम र मेला–महोत्सवहरूमा प्रदर्शन गरिने प्रस्तुतिहरूले नेपाली लोक संस्कृतिको मौलिकता र गरिमामा नकारात्मक प्रभाव पारिरहेको निष्कर्ष निकालेको छ।
संस्थाले हालैका केही घटनाहरूलाई उद्धृत गर्दै सम्बन्धित पक्षहरूविरुद्ध छानबिनको माग गरेको छ। प्रकाश अधिकारीको युट्युब च्यानलमार्फत सार्वजनिक गरिएको दोहोरीमा प्रयोग गरिएका शब्द, हाउभाउ र प्रस्तुतीले दोहोरी गीतको मर्म र सभ्यतालाई नुकसान पुगेको ठहर गरेको छ।
गुल्मीको महोत्सवमा गायिका ज्योति मगरको स्टेज प्रस्तुती दौरान देखाइएको गतिविधि सामाजिक मर्यदाविपरीत र गम्भीर आपत्तिजनक भएको जनाएको छ। त्यस्तै, एक धार्मिक स्थलमा मोडल रिया खड्काले देखाएको असभ्य नृत्यले धार्मिक र सांस्कृतिक आस्थामा चोट पुगेको भन्दै संस्थाले कडा आपत्ति जनाएको छ।
राष्ट्रिय लोक सञ्चारकर्मी नेपालले यी घटनाहरूमा संलग्न कलाकारहरूलाई प्रचलित कानुनअनुसार कडा कारबाही गर्न जोडदार माग गरेको छ। संस्थाले यस पत्रको जानकारी गृहमन्त्रालय, संस्कृति, पर्यटन तथा नागरिक उड्डयन मन्त्रालय, र साइबर ब्यूरोलाई समेत पठाएको छ।
