३ जेठ, हुम्ला। वर्षायामको सुरु संगै मानसरोवर कैलाश दर्शनका लागि आउने भारतीय धार्मिक पर्यटकहरूको संख्या सिमकोटमा उल्लेखनीय रूपले बढ्न थालेको छ। सिजन सुरु भएदेखि नेपालगन्जबाट हवाई मार्ग हुँदै जिल्ला सदरमुकाम सिमकोटबाट हिल्सा हुँदै चीनको मानसरोवर कैलाश पर्वत दर्शन गर्न पर्यटकहरू आएका छन्। चार दिनमा मात्र १६९ जना तीर्थयात्री सिमकोटमा आइपुगेका छन्। हुम्ला हुँदै कैलाश मानसरोवर दर्शनका लागि सिमकोट विमानस्थलमा आएका तीर्थयात्रीहरूको संख्या १६९ रहेको सिमकोट विमानस्थलका प्रमुख महेन्द्र सिंहले जानकारी दिएका छन्।
उनका अनुसार, वैशाख ३० गतेदेखि चार दिनमा भारतीय तीर्थयात्री १४७ र अन्य देशका २२ जनाले सिमकोट पुगेका छन्। प्रतिकूल मौसमका बावजुद शनिबार मात्रै तीन उडानहरू भरेको समिट एयरको जहाजबाट ४७ तीर्थयात्री सिमकोट आइपुगेका छन्। तीमध्ये २३ जनाको कैलाश मानसरोवर जाने परमिट नभएर सिमकोटमै बस्नुपरेको छ। गत चैत २१ गतेको मन्त्रिपरिषद्को निर्णयअनुसार शनिबार र आइतबार सार्वजनिक विदा भएको र परमिट नभेटिएकाले २३ भारतीय तीर्थयात्री सिमकोटमै बस्ने भएका हुन्।
मानसरोवर कैलाश दर्शनका लागि आउने भारतीय धार्मिक पर्यटकीय आवागमन सुरु भएदेखि चार दिनको संख्या हेर्दा बढ्ने विश्वास गरिएको छ। विसं २०७२ को महाभूकंपपछि हिल्सा नाकाबाट भारतीय पर्यटकहरू आउन सुरु गरेका थिए। तर, कोरोना महामारीका कारण हिल्सा नाका बन्द हुँदा पर्यटकहरूको आवागमन रोकिएको थियो। गत वर्षदेखि चीनले भारतीय पर्यटकहरूलाई हिल्सा नाकाबाट मानसरोवर कैलाश यात्रा गर्न अनुमति दिएपछि गत वर्ष चार महिनामा करिब ६५०० भारतीय पर्यटकहरूले धार्मिक यात्रा गरेका थिए। यस वर्ष वैशाख ३० गते पहिलोपटक तीर्थयात्रीहरू सिमकोट आइपुगेका थिए।
