रास्वपाका सांसद गणेश कार्कीले ‘लुसिफर राइजिङ’ नाटक बन्द गराइएको विषयमा चासो व्यक्त गरेका छन्। कार्कीले “निर्बाध कलाकारिता र स्वतन्त्र पत्रकारिता लोकतन्त्रका अभिन्न अङ्ग हुन्” भनी नाटकका निर्देशकसँग सम्पर्क गर्न आग्रह गरेका छन्। उनले धम्की दिने जो कोही भएपनि त्यसको जानकारी दिएर अनुसन्धानमा सहयोग गर्न समेत अनुरोध गरेका छन्। ११ जेठ, काठमाडौं । राष्ट्रिय स्वतन्त्र पार्टी (रास्वपा) का सांसद गणेश कार्कीले निर्बाध कलाकारिता र स्वतन्त्र पत्रकारितालाई लोकतन्त्रका महत्त्वपूर्ण पक्ष भएको औंल्याएका छन्। उनी संघीय संसद अन्तर्गतको राज्य निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिका सभापतिका रूपमा कार्यरत छन्।
‘लुसिफर राइजिङ’ नाटक राजनीतिक कारण र सुरक्षा अवस्थाको हवाला दिँदै बन्द गरिएको विषयमा मेरो चासो छ,’ उनले सामाजिक सञ्जालमा बताएका छन्, ‘सरकार र पार्टीसँग बुझ्दा त्यो नाटक सञ्चालन हुन नपाउने भन्ने कुनै सोचाइ छैन। तर धम्की दिने को हो भन्ने तथ्यांक पत्ता लगाउन खोज्दा सो नाटकका निर्देशकसँग सम्पर्क गर्न सकिएको छैन। थप जानकारी संकलन गर्दैछु।’
कार्कीले थपे, ‘निर्बाध कलाकारिता र स्वतन्त्र पत्रकारिता लोकतन्त्रका अभिन्न अङ्ग हुन्।’ उनले भने, ‘‘यसमा कुनै सीमा लगाउने कुरा सरकारले विचार गरेको छैन भनेर भर्खरै सेन्सर बोर्डमा भएका परिवर्तनले प्रमाणित गरेको छ। अहिलेको निर्णय अनुसार फिल्ममा ‘‘यो सीन काट्नुस्, त्यो फेरि लेख्नुस्’’ भनेर निर्देशन दिइँदैन, दर्शकले हेर्न मिल्ने वा नपाइने विषय छुट्याइन्छ।’
उनी नाटकका निर्देशकसँग सम्पर्कमा आउन र धम्की दिने जो कोही भएपनि त्यो जानकारी सार्वजनिक गरेर अनुसन्धानमा सहयोग गर्न पनि आग्रह गरेका छन्।
सम्बन्धित खबर
